يالله عسى طيب الرياجيل مايزول

.
.
يامل قلبٍ بين الاضلاع محمول
قامت صواديف الليالي تلوحه

‏يالله عسى طيب الرياجيل ما يزول
‏وتقلل الي قاصراتٍ شبوحه
‏
‏لا حول يابعض المخاليق لا حول
‏ما يسامح اليا من طلبت السموحه

كل واحدٍ فيما يسويه مسئول
ويشتال ما سوت يدينه بروحه

والي علومه كنها صفقت الجول
عسى دواليب الليالي تشوحه

ترى خفيف النفس ما هو بمقبول
الي يكثر بالمجالس مزوحه

مير الصبر عن عوجة الناس معقول
احدٍ هدم واحدٍ يبني صروحه

واليا بغيت العلم ياتيك منقول
من مصدرٍ ماهو مصرح بوحه

قول الحقيقه غاب في محكم القول
كلن يضمد بالمواقف جروحه

مشاكل الايام في شرحها تطول
لكن عليك ابمن يسليك ضوحه

والمجلس الي للرياجيل ..مدهول
لو كان ما حطوا على البيت لوحه

الطيّب المعروف ماهو بمجهول
الي مواقيف النشاما طموحه

انا اتنقى جوهر القول واللول
من شان ما تكثر علينا شفوحه

الناس ما تعرف من العرض والطول
تعرف بفعلٍ شاهداتٍ فتوحه

.
.
🖋 عبدالله عيد الحنيني