اللي بقى لي منك صورة ومظروف

مع العلم انني اتجنب الردود على بيوت الغزل ولكن تحت الحاح وطلب من احد الاعزاء تجوابنا مع طلبه وابحرنا في بحر من الخيال لايمت الى الواقع باي صلة مجرد تحقيق لرغبة عزيز في مجاراة لبيت من الغزل قد يكون من منقولة ارسلة وجاريناه

البيت المرسل

أومر تدلل بس لا تطلب الشوف****واشلون اشوفك وانت ما خذ عيوني

ردي ومجاراتي على البيت السابق

يا اللي خطفت القلب من داخل الجوف****أحذر ظنونك لا تخالف ظنوني

أشغلتني في الزام وأشغلتني بوف*****واقسى جروح القلب لأجلك تهوني

فكري يسطر لك ترانيم وحروف****وانا على ذكراك زايد جنوني

اللي بقى لي منك صورة ومظروف****كل ما نسيتك بالزمن ذكروني

باقى غلاكم ثابتن ماله وصوف****باقي غلاكم فوق ما يوصفوني

إعصار ودك بالهوى لافني لوف****متى على الله بالهوى ترحموني

ليتك توايق داخل القلب وتشوف****أضحى غلاكم من سبايب طعوني

يا اللي معذبنا ترانا لك ضيوف**** يا اللي خذيت القلب خلك حنوني

الضيف له له حقن مع الناس معروف ****ترا العرب بالضيف مايرخصوني

وتبقى غلاكم ما يبي عهد وحلوف**** يبقى غلاكم فوق ما يذكروني

الزام : الدوام أو العمل
أوف off: العطلة نهاية العمل