اشياء تقهر

تهيض المكنون من شوفة العين = شي حدث بالكون لين افسد الكون
قامت تغير في الحياة الموازين = والوضع ياهل العرف من دون في دون
اهل الفساد الضالين المضلين = قاموا بالارض ومن سكنها يععبثون
تدمير واحراق وتعدي على الدين = وبطش وتحدي والعرب كيف يرضون
ياهل الكرامه ياعرب يامسلمين = يا هل الشجاعه والوفا وشتحرون
اليوم ذبح وقصف باهل فلسطين = وبكره على كل ا لعباد يتعدون
اصل البدايه والتعدي با الادنين = والنقص فينا والصهاين يزيدون
اسياسة تمشي على غير تقنين = النهب تخطيط من اهداف صهيون
صرنا نواجه في وطنا شياطين = يتوسعون وينهبون ويحرقون
حتى الفضاء لاهل الخبايث ميادين = بالكون كله يفسدون ويعيثون
وحنا نشوف ومذعنين ومهانين = ونشكي مصايبنا على كل ملعون
بديارنا صرنا صغار وذليلين = ونطلب من اعدانا علينا يعطفون
عقب المعزّه كيف صرنا مساكين = من اليهود اخبث بشر نطلب العون
اعدادنا تبلغ ميات الملايين = وببلادنا يذلنا اثنين مليون
الدين فينا قل واستفحل البين = وصرنا بذل ووضعنا غير مامون
نظلم ونذبح والنتيجه مدانين = ومصيرنا في يد هل الشرك مرهون
بسويسرا نشكي ونرسل محامين = فقط نبيهم للجرايم يدينون
وعلى المزاج يعدلون القوانين = ليا ما رضوا قانون بدل بقانون
وصرنا على هالحال مابين نارين = نشكي ونبكي واليهود يتصدون
والصير طال سنين وسنين وسنين = واليوم كل شايف الضيم مغبون
نطرد ونذبح مثل ذبح الخرافين = وبلادنا مطمع لصاحي ومجنون
يطاردون ارجالنا يسار ويمين = ويحاصرون اشعوبنا ويتحدون
وين الرجال الصادقين الوفيين = الحازمين اللي من الله يخافون
وين العرب وين الرجال العزيزين = اللي على الاسلام واهله يغارون
وين الشجاعه والشرف والشريفين = اللي عن الواجب باالار واح يفدون
الى متى نقهر ونرضخ الى وين= يا اهل الشرف متى من النوم تصحون
المسلمين بكل ديره مهانين = وانتم بواشنطن ولندن تمشون
عودوا لواجبكم بكل الميادين =تحركوا في صدق والنصر مضمون
بالاوله كونوا على الدين حرصين = تحصنوا بالدين وابنوله حصون
صيروا يد وحده بوجه المستبدين = في صف واحد والله اللي به العون
ولاتصدقون اقوال ناس خبيثين = ترى الخبيث يعاهد الله ويخون
ولاخير في مال اذا ماقضى الدين = ولاخير في عيش المذله مع الهون
المال ماحنا منه مستفيدين = من قبلنا ماخلّد المال قارون
المال ساسه ينصرف دون ثنتين = دون الشرف والعرض والباقي يهون
وكل العرب ماهم عن الوضع راضين = لكن متى الصيحه على شعب شارون
ولازم نقاطع منتجات المعادين = من امة الاسلام لايستفيدون
مقاطع صامد وتاثيره يبين = لو ما خسروا هالعام بكره يخسرون
ترى مقاطعهم يسوي مضامين = ترخص بضايعهم وهم يستحسون
وتضعف تجارتهم ولو هو بعد حين = لين انهم عن واقع العلم يدرون
من غيرهم نلقا مصادر وتموين = ارخص واخير ومصدر الرزق مضمون
صيحة ندا لاهل الجدود العريبين = اطلقتها وانا من الوضع محزون
واسوقها للصادقين الميامين = اللي من دون الحق والدين يثنون
ما يستح العار ناس كريمين = العار لاهل الشرك وابليس ملعون
الله يعدل مايلات الموازين = وعسى العرب من غفوة النوم يصحون

ــــــــــــــــــــــــــــــــــــــــــــــــــ ــــــــ
تعتبرهذه القصيده من السهل اللي يقول مثلها لكن الهدف ثقيل

وانتم بواشنطن ولندن تمشون
هذا الواقع صح الله لسانك

الاخ القديرالشاعرابوخالدالفريدي

صح السانك وبيض الله وجهك ودام الله عزك

تسلم على هذي القصيده الجزله والرائعه بروعة حضورك الجميل

تقبل تحياتي وتقديري

صح لسانك مليون على القصيده
والله يـعـطـيـك الـعـافيـــــــــــة
بيض الله وجهك

قصيدتك كفو وانت نوماس وعلمك غانم
صح لسانك وانا اخوك على هلقصيدة الأكثر من رائعة
من شاعر جزل ومتمكن ..
شكرا ً لك من الأعماق على هذا الحضور وهذا الابداع
وتقبل خالص تحياتي وتقديري

محمد عويض البدراني
وليف الشوق
الحب الياقي
ابو فياض النويمي
اسعدني مروركم وتأييدكم لكم جزيل الشكر والتقدير

صح الله لسانك

ورحمك الله