نفحة حياه..وروح .. !!

اعزائي .. السلام عليكم ورحمة الله.
بعد رحله اجتازت ربع قرن وتقترب من ثلث قرن مع الشعر تخللها كثير من التغيرات بالافكار
والظروف.....رآيت ان احدد وقت كل قصيده ليراعى ذلك .
ومهما تغيرت الاحوال يبقى الشعر متنفس في وقته وشاهد للمستقبل..
وهذي القصيده كتبتها بالتسعينات الميلاديه..ارجو ان تجد القبول لديكم

انا البارحه ماغير واقف.. واجي واروح=بنات الفكر عيّن عن النوم لاذوقه
هبوب الشعر هبت.. واثر للقصايد بوح=تنهت له المكبوت من قاصي عموقه
هلا ياقصيدٍ هب..نفحة حياه وروح=تكلم ترى مثلك شفا الروح منطوقه
هذا وقتك وشاعرك ولهان لك..مشفوح=بحلمه ومشواره وهمه وطاروقه
ياكثر الهموم.. وياصبر خافقٍ مجروح=رغم كل مابه ..يم الافاق له توقه
خفوقٍ لو دروبي تضيق ويشح الضوح=فلا ينثني عزمه ولا ينطفي شوقه
لغت وقتي اللي كلبوها نكد وجروح=ماينصت لها رجلٍ فزع يطلب حقوقه
وربي..لوان إعْياي يغريه ظل الدوح=مااريح بسفح الظلع ولي منزلٍ فوقه
ولا والله اهدى لين حلمي يفز صروح=وعديه وارقب قمٌةٍ فوق مرموقه
ابي اعانق هناك الثريا واعز الروح=اجل ماهموم العاشق عْناق معشوقه.؟
مدام الفضا واسع وياخذ بعيد الشوح=ورى مايحلق به ويملاه بسبوقه.؟
اهيجن مساريّ..وبروق الوصول تلوح=عيوني ماتكذب..خالت المزن وبروقه
ياقرب الربيع وعبْق عشبه قريب يفوح=قريب اتنفس طلعت الصبح وعبوقه
ومدام القصيد ان هب نفحت حياه وروح=انا ليه فنجاله على الناس ماسوقه ؟

ابو غازي