القصيده مهداه

القصيده مهداه
اعزائى
اهدي لكم هذي المشاركه وارجو من الله انها تحوز على بعضاً من استحسانكم الراقي
.مع التحيه الي الاخ العزيز الفاضل/ماضي بن رباح المشيعلي الحربي ,حيث
قابلته عند ابله ولضيق وقتي اعتذرت منه بهذه الابيات

جعل الحيا يسقي شمال الهديه =من مبكر الوسمي تجيه النصوبي
تقهر مقاديمه هبوب السقيه =لين يتراكم مثل خشم الهضوبي
واليا ارتدم نوه بدبرت وليه=يسكر من الشرقي نسيم الهبوبي
ياذن مكاييله عليها عشيه=لين يتعاطن من مطرها الخبوبي
مرباع وضحٍ فوقهن محنيه=معرباتٍ باصلهن والنسوبي
هاذيك من ذيه واذي بنت ذيه=سلايلٍ منهن وفيهن ضروبي
طوال الرقاب اللي لهن قابليه=وضحٍ خزايز يشلعن القلوبي
اليا شافهن اللي فاقدله رعيه=ينسى غرام اللي وراها يهوبي
لادرت وحدتهن ولا فيصليه=في طول قامتها وعرض الجنوبي
والراس ضافي والطبايع هديه=ماحذفوها محذ فين الذهوبي
يوده لهن ماضي بعيد النحيه=عوق الخصيم اليا نفخ باالذروبي
ايً والله افخر فيه وفخر بزيه=وافرح بمن مثله بوسط الحروبي
دين وسخا والهام نفسٍ رضيه=سمح المحياء في لسان عجوبي
يابو جزاء لاهنت حقك عليه=جيتك بمسياٍر قضى لي نوبي
لو كان في خاطرك لي مثنويه=من طيب خيمك يا نزيه العيوبي
واقول خله دين والشي نيه=دينن عليه بالحياه محسوبي
ياابن الرجال اللي بوقت اليديه=عرين اسد ولايزال مهيوبي
نطاحة الطابور في كل هيه=يروون حد مشلشلات الكعوبي
مااقولها بعيال مشعل زريه=والعالم اللي مطلع بالغيوبي
يشهد لهم تاريخ نجد العذيه=واهل البخت من طايفات الشعوبي
قصه نويشي قصةٍ عالميه=عساه عن حام اللهيب محجوبي
في جاه من شرف مساعي نبيه=أمين ياغافر جميع الذنوبي

مع تحيات / غازي مغيران الزغيبي..