متى الدراهم عليّ تصب = صب المطر فوق صحصاحي
النار وسط الضمير تشب = والقلب مامر الافراحي
عامين وانا سواة الضب=أطرد سرابي وضحضاحي
يالله ياخالقي يارب=تطرد عن البال الاشباحي
في كل ساعه عليّ تطب =وتجي وانا راقد وصاحي
متى الهبايب عليّ تهب =وتسوقها يامل الماحي
ماودي امدح ولا ابغى اسب=أبستوي عقب مطراحي
بعض العرب قشر مابه لب=يبغى التفاخر والامداحي
وان جاته اللازمه ينكب = ماله ضوايه ومسراحي
لاهو حطب للشتا يحطب=ولالخرمس الليل مصباحي
يبغى المدايح بلا يتعب=يحسب بلغها بالامزاحي
بالهذرمه له شهادة طب=ونفخه على لاح وملاحي
لوحيت هرجه تقول يهب=بيديه الاجواد ملواحي
والا الحقيقه صديع وهب=دكتور بالخرط جرّاحي
في كل مجلس لفا يهذب=وبلسانه النجس لمّاحي
يعيب هذا وذا يشذب=ولستر الاجواد نزاحي
كنه ولا بالحياه اذنب=شيخن مع الناس مصلاحي
واليا كشفت المغطى ذب=ذب السلوقي للابراحي
ويدوّر الدرب والمهرب = من بعد ماكان نطّاحي
ضوّن لها بالمجالس شب=شبّابها وسطها طاحي
يالايمي ليه انا ما اعجب=وقتن به اللاش مرتاحي