قصيدة بعنوان:
(( اسطنبول ))
بقلم / فواز محسن الزويهري الحربي
🍂🍂🍂🍂🍂🍂🍂🍂
باسم الله اللي قارب الشرق بالغرب
بطيور توقد نار فوق السما سرب
من دون ريش ولا لها زاد مع شرب
بالعلم تصعد فوق مركوم الامزان
قالوا نبا موجز عن ديار الاتراك
قلت ابشروا.. والعلم حاويه بدراك
نويت اسافر.. قلت يالله رجواك
سألت واستفسرت أصحاب واخوان
قررت ارُوح لتركيا للسياحه
قالوا في اسطنبول تلقى مساحه
للفكر والتاريخ يلبس و شاحه
مدينة تكتب من الحُسن عنوان
قلت احجزوا فافضل خطوطٍ على الجو
قالو خطوط الترك قلت احجزوا تو
ووصيت فاحسن مقعد أكون مستو
والطائرة دورين و الخدمة افنان
جيت المطار وقلت بالله توكلت
واثره صغير وفيه كله تجولت
الطايف الدولي كراجين وازفلت
قطعت بردنقي وحان الوعد حان
ركبت طيّارة كما الفان حشرة
والمقعد المامول متعب بصغره
طرنا وصرنا فالسما قد الابرة
وجزنا ثلاث بحور من غير نقصان
جينا اتاتورك ونزلنا المدرج
مطار واسع فيه مولٍ مبهرج
تهنا وحنا فالجمال انتفرج
وانهيت أوراقي على طيب واحسان
وأهل التكاسي كُثر كل له نسِيم
وقفت شايب قلت بنروح تقسيم
أشر لنا خمسين ليرة بلا ضيم
ركبت والغيمة ترحب بهتان
جينا على تقسيم وأثره عجايب
ميدان حوله شفت كل الغرايب
نصبٍ من التذكار مابه عوايب
والناس تتصور مع أحباب واخوان
في شارع استقلالهم آتسوق
مقهى ومول وكل حلو اتذوق
صاخب .. ولهل المدن شارع يشوق
واللي يحب البر ما فيه له شان
جينا لمكتب قال ودك نوديك
في بورصة وتركب سفينه وتلفريك
وبالثلج تلعب والمزاور نوريك
شفت الطبيعة لابسه ثوب كتان
من بعدها شديت رحلي وغيرت
روحت لسلطان أحمد وأمعنت
في قصة التاريخ فيها تسمعت
شفت الحضارة.. شاهدة عبر الازمان
زرت المتاحف والقصور المنيعه
وفي صوفيا قُبه عظيمه رفيعه
تحكي صراع اديان قصه شنيعه
تروي صداها المأذنه ورسم الاوثان
واعجبني البازار مبناه مسقوف
سقفه عليه الرسم بازهار وحروف
وفيه البضايع والبدايع لها صنوف
والسعر متفاوت على غير ميزان
وكنت اتنقل عبر مترو وتكاسي
التكسي بلعداد سعره قياسي
وللمترو بطاقه وعدة مراسي
شي عجيب وفيه تخطيط واتقان
ثم انتقلت لحي عصري حضاري
فندق على الشاطي ومول بجواري
صفيت فيها الذهن وللبحر طاري
والبحر يوسع صدر عاشق وولهان
ثم دقت الساعة ونادت بلادي
جاوبلها حسي ولبَّا فوادي
معاد يهنالي شرابي وزادي
ياغير في دار المعزه و الايمان
دار السعود مطوعين الأعادي
أخوان نوره باسطين الأيادي
وختامها صلوا على خير هادي
محمد المختار من نسل عدنان
〰〰〰〰〰〰〰