أرقى بذوقك خلّي الفاظك الحان
لاتِنسبق بالطّيّبة ياعُكاشة
لاتنشِد السّهران وشفيك سهران
لو كان جاه النّوم راح لفراشه
تراك يوم تلومه تكون غلطان
يمكن يجيك الرّد يحمل دفاشة
أحيان قِل النّوم من ضيق وجدان
وتفكير فالحسرة وزود إندهاشة
ومايجُرّ ونّه غير من كان سقمان
ويزداد سُقمه فيه لنكان ناشه
ولّا سليم الجسم بيعيش سلطان
واللي قليل اهموم محسوب باشه
واللي ضناه الشّوق في غُلب وأشجان
مايحسب اللي ينفعه من معاشه
ومن فارق الغالين مأسور باحزان
يخفي دموعه دافعه قو جاشه
جُند السّهر واجد لها سيف واحصان
ماتخسر فميدانها ياعُكاشة
الشّاعر/ خالد بن عبيد بن معتوق الأحمدي