صدمة الايام في قلبي حسايف=كل مامرت من الدمعة روينا
صارت احلامي على قلبي كلايف=مرت الايام وحنا ملتقينا
مثل ضامي ورد فاخت للولايف=مالقا سقيا ولاشافه فطينا
كل ماجروع حنينه عاد هايف=في صحاري مابها نزل وقطينا
في زمانِ شفت في حاله عجايف=مايعدّل ميلته طول السنينا
ماتت قلوب البشر والكل عايف=والفرح ميت مع اللي ميتينا
لوتشوف إنسان يضحك قلت خايف=تقل ناجي من طلق للمارتينا
مستخف وصار في هرجه خفايف=يلتفت ويقول مرت من يمينا
ذا زمن للموت منظر فيه لايف=يحترق طفل العراق بوسط سينا؟ّ!
ماتت الفزعة على اطراف الشفايف=ومن نطقها نبرته صوتٍ حزينا
راحت امجاد العرب مثل الطرايف=واكبر الامجاد قتل الآمنينا؟؟!
وبعثرة بالشمل واصبحنا طوايف=كننا ناسين معنى مسلمينا؟!!
وضعنا وقف على جرفٍ مهايف=خوفنا ينهار وحنا نايمينا
ياوجيه الخير يا الشم النوايف=وحدو لله بالحق المبينا
وجذو عروق التطرف بالرهايف=قبل لاتثمر شجار الدوم تينا
تينة مسمومة سم الزعايف=من بلعها تحرقه عرق الوتينا
اتبعو هدي النبي في قلب رايف=و عاملو للكل في عطفٍ ولينا
تستقيم احوالنا والطلع صايف= ومن ثمار جهودكم خيرٍ جنينا