السلام عليكم ورحمة الله وبركاته





سحر البيان اللي يعبر بمعناه
ومعناه يشغل للفرايد وضيفه
وسترسلت منه البيوت المبناه
ابيوت نبدعها اجداد ونضيفه
شعر النبط لاطاب سمحً محياه
في حال ولا حال مثل الرهيفه
حدب السيوف المرهفات المحناه
اللي تفرق عن وليفاً وليفه
قلته وانا شاعر وعندي معاناه
اخفي وهجها بالضلوع الهديفه
مابوح باسرارً عن الناس مخفاه
اخشى كلام اهل العقول السخيفه
اللي كمى الديبان حوجً مطواه
واذنابها مع روسها بالحتيفه
يخاف منها كل رجلاً بممشاه
متسممه لو الملامس لطيفه
وبعض الاوادم لا وجاهن ولا جاه
ون غاب اخو مره يصير الخليفه
حضرة ابليس اذا حضرله تعصاه
ثم قام يوميبه سواة اسفيفه
تشوف وجهه تحسب انه مقفاه
وعينه عن المعروف عمياً كفيفه
والرجل يعرف من اسلوبه ومبداه
مثل الحيا ذكره اشتاه ومصيفه
نبذه بسيطه قلتها ياهل الجاه
وياهل الفعول الساميات الشريفه
ولو كل مايذكر على البال قلناه
كان المجال يطول وسط الصحيفه
وكثر الكلام وطايله مابغيناه
منشان ماتجي الثقيله خفيفه
وصلو على اللي في مسيره تبعناه
نبينا اللي مايوصف وصيفه

سعد ضعيان الحربي