أنا والأشواق قررنا=نبحث عن الطيب حيث يكون
وبعد القرارات صدّرنا=سلام فيه الوفا مضمون
مثلك تعبنا ودورنا = ومن طيبكم خاطرى ممنون
وعن مثلكم ماتخيّرنا= يامرحبا والعسير يهون
بالود فاضت مشاعرنا=وودادكُم مِشتهر معلون
واللي يفرِّح خواطرنا=تكميلكم ياهل القانون
سوايرك من سوايرنا = وما يصيبنا فى وفاك ظنون
وان كان قصّرت تعذرنا = المرء يا ما تجيه شطون
شواهِد الطيب تأسِرنا=في فنك الناقي المصيون
والأن نبغاك تحضرنا=وتلقي لنا البال هون بهون
تحت الطلب وانت تأمرنا = آمر وانته علينا تمون
وللى يجى منك حضّرنا= ما يلزم لقولك الموزون
حاير ويبغى يحيّرنا=ويطشنا في لهد وغبون
لا عسعس الليل ناحرنا=إلا يحارب حجاج النون
ابغى اسالك وانت خبِّرنا= بالرمز عن خافى المكنون
حتى اذا الحكم حررنا = ما تلومنا فى سهرها عيون
ياما كتبنا وسطّرنا=بدموعنا والعرب يقرون
واللي اسانا وكدّرنا=مارّق في حالة المغبون
مهما تعبنا وتضررنا = ومهما نلاقى العذاب فنون
ما نطيع منهو يحذِرنا= والنُصح مايطيعُه المفتون
كُل ماصبرنا وثابرنا=تجددت للعذاب شؤون
والحق لو مايناصِرنا=يزيد فوق الحزون حزون
فالليل كل ما تذكرنا= ما صار ويصير لهل الكون
حاول وقُلُه أواصِرنا= اقوى من الظن والمظنون
نحنُ معا رأيُكم سِرنا=على رسم جوهري متقون
لكنه اللي مسهرّنا =كل يوم يصدر عذابه لون
وشائج الود تجبرنا = نرعى عهود الهوى ونصون
ولولا التعب فيه ما صرنا = نقول كسراتنا ولحون
عنيد للود ناكِرنا=ولاقدّر الخاطر المحزون
ومادامك إنته تقدّرنا=لاتكُبني فاللهد مدفون
ان كان قصدك تشاورنا = ابشر وهذا الامر مسنون
موقفك ناير يبّشِرنا= انك على الجانب المأمون
واختم كلامى يا شاعرنا = واقول ما انته لهم مديون
ويعوِّض الله خسايرنا = بامر يصدر بكاف ونون