ياهيه يا ضاوي على صالي النار=النار يعرف كبرها من عمدها
والموت أعرفه حيل قصَّاف الأعمار=ونفسٍ تعرف حدودها واسعدها
ياشيب عيني من خفيات الأسرار=والله كبيرة .. ياعرب وش بعدها
الحنظلة كبرت على كل الأشجار=ما أدري عسى وش عندها من سندها
يوم الركايب جات من كل الأمصار=من غير ما يدرون كلٍ وردها
في أرض قفرى والمخاليق صدار=والبير عورى دلوها ماجبدها
أشناب علت من عذيات الأمطار=وأشناب مدت للنطيحة مددها
تهافتوا كلٍ بعذره والأعذار=ماينحصي مقدارها من عددها
يا الله زبنتك ياولي حق غفار=ياعالم الشيحة .. وعالم بلدها
لو كان نبته جات من بين الأزهار=ماكان الأجرد قبل تكبر جردها
لكن عزانا لابدا صرف الأنظار=وكلٍ توقَّت في الهوايل ولدها
من دوَّر الدنيا على الضيم صبار=ومنه شقاه الطيِّبة ما جحدها