|
|
اشتـــاق للديره والأشـــوآق تعذيـب
يــــــوم اتذكّـر منـزل اعـزّ رجــــال
بقي الشجر وجبال صـم ومراقيـب
يازينها الوقفه على ذيـك الاطــلال
ادعي بها يـارب لدعـــايـه تجيـب
وتسكن المرحـــــوم جنـات وظـلال
اللي فقدته طفـــــل معـرف مكاتيـب
وودعته اضحك لين ما فراقنا طـال
في ليــــــلتن شفنا بهـا شـئ مريـب
يوم دفنوه وبعضنا ضعـاف جهّـــال
يوم دفنـووه ومسّكـــــونـي لعابيـب
ويوم امسحوا دمعي ببسكوت وريال
يوم تركوني خلفه القى الصواعيب
والقى بدال السهل مركــــوزه جبـال
الله ياعمـــــــر الشقـــــا والمتاعـيـب
ياضحكتن من ســــدها الدمـع همـال
والله ماهـــو نقص مـال ومطاليـب
والنعم باخوٍ قـــــدّهـا وعمّـن وخـال
بس الفراق يشيّب الطفل ويشيـب
ويهد نفس انسان ويخيّـب آمـــــآل
وين انت ياراع الكرم والمواجيـــب
وين انت ياللي تنضرب فيك الامثال
وين انت يارمز الوفا ومنبع الطيب
يفداك قبل المــــــــال يابويـه الحـال
وين انت ياللي عادي اقول له جيب
ما استثقل الكلمه له آســـآل وآسـآل
عشرين عام تغيب عنهم ولاتغيــــــب
عن عيني وصورتك ما تفارق البال
ناديت لين ادركت ويش المكاتيـب
وقلت البقا للخالـق ورب الانفــــــال
مابقي شئ الا طلب لاهـل الطيـــــب
قولو عسى الله يرحم ابويه((عقال))
فاصله:اللهم اسكنه فسيح جناتك واغفر له ولجميع موتى المسلمين ياكريم ياغفور يارب العالمين
|