|
|
ودّان
سلام صرفه ذهب و جنيه
ما يصرفـه غيـر صرافـه
وانت بثمين السعر تشريـه
ما ترخصه وانـت عرافـه
الـــــــــــذراع
يا مرحبـا و الغـلا نغليـه
الزين ما نجهـل اوصافـه
اذا طلـب حاجتـه نعطيـه
نحرص على رضاه وانصافه
ودّان
لعـل دوم الوفـا تمشيـه
واشكي بعد ذقـت مغرافـه
ماني من اول مفكـر فيـه
واليـوم شفقـان لاطرافـه
الـــــــــــذراع
الحـر لاحـام مـا يلهيـه
روعة جمال الـذي شافـه
فالحال ما يرحمـه يدميـه
يلوي جناحه علـى اردافـه
ودّان
بالطيب قصدي نهار اجيـه
واقطف ثمر حمرة شفافـه
ماني مصدّق نهـار اجنيـه
وارقى على حـد مشرافـه
الـــــــــــذراع
ليه الهجر و التـردد ليـه
مابيـن خـلٍ و ميـلافـه
من لافه الشوق ما يبريـه
إلا وصـال الـذي لافــه
ودّان
ليته بقربي عشان ارضيـه
واطفي اللهيب الذي حافـه
زاد المعنّـى بمـا يطريـه
حتـى بلـغ ذروة اتـلافـه
الـــــــــــذراع
اصبر على بعد من ترجيـه
صبـرك يقرّبـك لضفافـه
أمـا لفاكـم قبـل تلفيـه
ولاّ لفيـتـه فمصـيـافـه
|