سلام كله زهر وورود=مع باقة الفل شيدناه
مبني على ساس نبت العود=طعمه شهد حالي في مبداه

يا مرحبا يا فريد الجود=فافراحك الجود شاهدناه
تسلم على طيبك المعهود=كنز الصفا عندكم مثباه

تبقى ويبقى الوفا موجود=مابيننا والصفا محلاه
ومادام فرسم المعاني بنود=نبغى المثل يكتمل معناه

وفّيت يالشاعر المعدود=رسم المثل يكشف المجراه
هات المثل و اسمع المردود=من خاطري و الأمل فالله

هيا استمع شكوة الملهود=اللي سنينه مآسي وآه
يشكي مآسي الليالي السود=والآه زود عليه بلواه

ما باس يالصاحب المضهود=من نار الاحزان في شكواه
وضح أساس الأسى المقصود=لاوين صابر على المأساه

كيف الهنا والوصال يعود=وأفّرِح القلب في رجواه
وأنا على ضحكتي محسود=أضحك قهر والقهر ماأقواه

اسعى بالأقدام و المجهود=من هو سعى في أمر يلقاه
وانته كما الصارم المجرود=تقدر على كل ما تهواه

فالسعي ماني قصير زنود=واقف على فارعُه وأدناه
لا تطشني في فلك مسدود=يوم الأمل فيك أمّلناه

من قدّم الوافية موعود=يا حر نال الوفا واعطاه
للآن دون العلوم سدود=رسم المثل ماوضح مغزاه

رسمي على خارطه و قيود=مجوّدُه من أساس بناه
بس المآسي أُمم ووفود=وانا مع البُعد فملاواه

البعد ماله دوا منشود=ماظن إلا الوصال دواه
خلّى دموع الرجال تقود=مثل المطر لا تهامل ماه
حنين فقلوبهم و لهود=نيران جوف الحشا تصلاه
أطلب من الواحد المعبود=الخالق الحال ما يخفاه