ملفـاك بيـت(ن) للبعيـد وللقريـب=مشرّع(ن) بابه علـى طـول الدهـر
راعيه رجال(ن) عضب واسمه عضيب=اللي على الناموس والطيـب اشتهـر
ما هو كبير وشاربـه مليـان شيـب=من كثر صكات الدهر مـا هـو كبـر
مشيّبـه كثـر المـصـالا للهيــب=والحمس فوق الجمر الأشقر والسهـر
على دلال(ن) وزنهن نثـر السريـب=غثو(ن) على مقلع شجرة(ن) في مقر
وشيل الصواني في كبيرات العصيـب=اللي مكبـر وزنهـن قطـف الزهـر
وتذويبة الحجه علـى راس الطليـب=ياليـن يسقيـه المـراره والـكـدر
وبالشعر ما ينحاه من ينحا الشعيـب=اليا تقضقـض مـن علـوه وانحـدر
متوسقه مزن (ن) يصب الما صبيـب=سيله يحـوّل فـي جلاميـد الصخـر
اليا وصلته قول يـا سقـم الحريـب=يا عضيب يا ساس الحميـا والظفـر