سلام الله عليكم يالحروب بملتقى الاشعار= سلام المسلم اللي ماقصر تحية اسلامه
سلام المسلم اللي يقتدي في منهج المختار= ويعرف وشهو المفروض والواجب من احكامه
سلام الطيب من طيب النوايا مارد ومصدار = صدر من صافي النيه وجيه الخير قدامه
سلامن طيب ويقرن بريح الطيب والازهار = وريح العنبره والمسك في مبداه وختامه
اقوله في محل يزيدني تشريف مع مقدار = ليا جيته وانا طرقي مسير خطوة اقدامه
مواقع للرجال اللي لهم بالعاليات شعار = فعايلهم تلبسهم وشاح المدح ووسامه
بني حرب العريقه مكرمين الضيف والخطار= سنايد عز للاصحاب للعدوان لطامه
معاديهم ليامنه مشاله خطوتين انهار = من الهيبه يعود يطلب الله ترقل عظامه
مناجم معرفه تحكم صليب الراي والاشوار= ويشهد سابق التاريخ والحاضر من ايامه
لنا جيران واصحاب ولنا معهم نسب واصهار= ولهم مع كاسبين النعم قسم من اوفر اقسامه
ختام القاف قاف مصافحه في ملتقى الشعار = وتحياتي وتقديري لكم والمسك بختامه

هلا يامرحبا مثل الجواهر ماعليها اغبار=
=يفوح الطيب منها والوفى مرفوعه اعلامه
تراحيب المطر وملبسه بالماس عقد اصوار=
=عدد من زار مكه والمدينه لابس احرامه
ياراع الطيب والمعروف ياحرٍ من الاحرار=
=صناديد الرجال اللي لهم بين العرب قامه
نيابه عن قبيلة حرب درعي سيفي البتار=
=حزامي يوم كلٍ بالمواقف يكرب احزامه
عوايدنا مانبخص حق من جانا من الزوار=
=له التقدير منا والوفى والطيب وكرامه
من ايام السلف فينا ثلاثه تقل ريح ابهار=
=بها كلن درى في نجد واللي ينزل تهامه
خوي الجنب دونه ماندور بالزمان اعذار=
=حكايه باليمن سولف بها الشامي على شامه
وقصير البيت من شانه نسوق المال والاعمار=
=فدينا جارنا يوم المعادي صدر احكامه
لنا مشهود نحذي من كرمنا نسع الازوار=
=حقايق ماجهلها غير حاسد عاش بوهامه