ثارت علينا خبث مدري غشامه=بالوادي اللي فيه راحل ونزال
من صوتها بالجو صاير عسامه=وزاد الكلام وصار للهزل دلال
يامن تريد العافيه والسلامه =ترى الجزى مذكور من جنس الاعمال
ماينزل الرجال قدر ومقامه=غيرالدروب العوج وعلوم الانذال
من بعد ماهو حر مرفوع هامه= ينزل مقامه عند ماضين الافعال
بعض العلوم اللي تجيب الملامه =عنها الرجل يبعد بعشرات الاميال
ان شافها في نجد يرحل تهامه= مايصير لعلوم الفريقين نقال
ترى الفتى دايم يدينه كلامه=لو حاول التبرير في كل الاحوال
الناس ماهي جاهله في مرامه =تدرك نوايا كل صادق ومحتال
حاولت اغطي عيبها بالعمامه =وبانت لكل الناس رجلي وخيال
تبقى بوجه قليل العرف شامه=لو مات يبقى ذكرها عبر الاجيال
ياذيب ياللي فوق ريع الندامه=جريت صوتك وسمعه كل وبال
العوج ماتمشي علينا رخامه = عشنا كذا وابطال من ماكر ابطال
بيت لسبيل الله يرحم عضامه=راعيه مات وصار مضرب للمثال
من لاكرب وقت الشدايد حزامه =يموت ماحصل من النعم مثقال