اقرا كلامي واسمعه بالاذاني = واستوعبه بالعقل وافهم مقاله
وان كان ماتفهم رح الترجماني = خله يترجملك على مابداله
اللفلفه للمثعله والحصاني = وانا سوات السيف سيف العداله
ابتل واسيّد ماتبع الثعلباني = اللي يتلوى مثل حبل المحاله
وامشي بدربن متضح للعياني = ماني موجه ظرف ولا رساله
من واقع احوال الزمن والزماني = موقف جرى عبرت بلسان حاله
والد خصم بوجهي اليا هجاني = القول مايثر على كل حاله
اشوفه ارجل من صحيب يعناني = بشور النصيح ولا عطاني قباله
وارجل من المغتاب والصيرفاني = وقوم الخطط والمحيله والحياله
واقارب وعقارب وعقرباني = والكل منهم يدعي بالجزاله
واصحاب ضحكة ناب قاصي وداني = خلفي سباع وقدم وجهي ثعاله
هرج القفا طبع الذليل الجباني = وراعيه وجهه مثل حذوة نعاله
ومن لا يقابلك بكلام اللساني = عزالله انه من سلايل حثاله
وعطني خطاب موجهن بالمعاني = مقيول فيك وضمني للسلاله