للعلم دورُه فالوعي والثّقافة
لكنها الخبرة تفوق الشّهادة
والتّجربة مكسب تزيد بإضافة
تعزيز للمرء الحكيم اعتقاده
كثير من حولك تظُنّه خُرافة
ويفرض عليك تصدّق بغير إرادة
خُذ لك مثال اللي عطاك اعترافه
كم مرّة المرضان راح العيادة
وصابه من الطّب الحديث الحسافة
ولقا من الطّب البديل إستفادة
يجمع لك الوقت العجب بالطُرافة
وتُصدم من أحداثه وقوّة عناده
ولا تغّرك الهيبة بحلو القيافة
لاصار عقل الشّخص مابه ركاده
ولا تحتقر من منظرُه لك عيافة
ماتعلم ظروفه وطيبة فؤاده
حُسن النّوايا سِر حُسن الضّيافة
والطّيب والأحسان منهج عِباده
وبالله توكُّلنا يزيل المخافة
طريق للرّاحه وطرد النّكاده
والعزم يجلب للعزوم اكتشافه
يربط طموح النّفس فيه اجتهاده
وحدّد هدفك ولاتصيبك ضعافة
والصّدق والإصرار منهج سعادة
لوكان في دربك تطول المسافة
بس المّهم القلب يبلغ مُراده
وتحلّيك بالحِكمة يزيدك لطافة
وتحتاج للخبرة بجنب الشّهادة

الشّاعر/ خالد بن عبيد بن معتوق الأحمدي