يادار غني والهجي بالتغاريد = يحق لك لبس الوشاح الجديدي
يوم الوطن عيدك وعيدك لناعيد=لعل عيدك كل عام يعيدي
يادار فاعيادك نظمت الاناشيد= واجب علي افرح و اردد نشيدي
يادار من عاداتنا والتقاليد = اليا استفدنا منك لازم نفيدي
اعيد اغني فيك واعيد واعيد= ماهو خسارة فيك نظم القصيدي
مرحوم يامن وحد الشعب توحيد= الحربي اصبح للمطيري عضيدي
ولاعاد في الانساب نقصِ وتزويد = الكل بالجنس السعودي سعيدي
ولا عاد هذاعبد مملوك له سيد = كل العباد احرار ماهم عبيدي
مرحوم يامن وطد الامن توطيد= بالسيف واحكام الكتاب المجيدي
عبد العزيز مبدد الظلم تبديد= بالطيب واللا بالسلاح الحديدي
مرحوم ياملكِ خلفك الاماجيد= عن خطك المرسوم مااحدِ يحيدي
اولادك اللي فالمواقف صناديد= اللي لهم في الحكم رأي سديدي
اللي حكم واقفى بعد مانتهى القيد = نطلب له الرحمة لعله شهيدي
عسى البقا للحا ضر من الاجاويد = نطلب له الصحة وعمرِمديدي
عبدالله اللي شيد البني تشييد =حاكم حكيم وفي زمانه فريدي
ملكِ على الثنتين يعمل بتشديد = ساعة رحيم ونوب باسه شديدي
رحيم للي جاه ظلمِ وتهديد= للمجرم المحتال خصمِ عنيدي
وسلمان له قسمه في كل المواريد = كلِ يعرفه من قريب وبعيدي
في عهد ابومتعب جنينا المقاصيد= كل المعاني جت على مانريدي
في كل عام اجدد العهد تجديد = بيعة على الطاعة وعلمي اكيدي
عني وعن ربعي هم احزامي الجيد=والله على علمِ ذكرته شهيدي
ختم الكلام ازكى تحية وتمجيد = لك ياملكنا يالزعيم الرشيدي
قلته وانا سالم جميع المناقيد= ترى الكلام الزين دايم رصيدي
واللي يريد اسمي اجيبه بتحديد = انا حسين مريع ابن العبيدي