فالمدارس يامهجرس مادرسنا=ولاخبرنا الطيب يجزاله بسئيه
من دروس الوقت عشنا واقتبسنا=والجهاله يوم وقت الجاهليه
وكان بعض الناس في علمه لمسنا=عارفينه ماش شمس ولاش فيه
والردي بالعرف مايقطع حنسنا=ماعليكم منه وانا ماعليه
كم حفظنا بالضمير وكم حبسنا=والرديه بينوها اهل الرديه
ولاتعومسنا ولاتظهر عمسنا=خص لاصارت تجي من راس عيه
ولو عرف ماقلت يومنه عكسنا=كان شال القش في ظهر المطيه
يحسبني بانطح القشرابحسنا=مادرى ان راع الخطا يلقا خطيه
ولادرى انالا تعدوينا ندسنا=ونلحق الكيات ياهل العرف كيه
ولاقدمنا في طريقٍ ما نكسنا=لو وطينا فوق داب وفوق حيه
ونلطس العايل لامنه لطسنا=وله حساب التاليه والوليه
والفراسه عندنا لامن فرسنا=لايحسب انه ركب ظهر العبيه
كان مابه عد كيف الرجل يسنا=ودون عدالعرف صارت مهمهيه
كيف نعري جسمنا من مالبسنا=اللباس الخارجه والداخليه
والمصيبه فولنا خالط عدسنا=والخوي قام يتبرى من خويه
واصتبحنا يامهجرس واغتمسنا=والبواقي عند راع الشاذليه

بعد ابومنصور ماحرك جرسنا=بالبيوت اللي تقل وقع برديه
والله انا من سببها مانعسنا=نعسةٍ نقدر نسميها هنيه
ازعلتنا وانشوينا وانحمسنا=من زعل شقر الحرار الصيرميه
الخوي ماكدره كدر ونسنا=جدنا الاول موصينا وصيه
والا ابو منصور وده يفترسنا= مير ماجتله على كيفه وغيه
لو حصله ظنتي كان التمسنا=لين بالشكوى يحملنا طميه
ولو همس بسموعنا مثله همسنا=في سموعه قبل لاتصبح قضيه
خلنا من سالفة ضيق نفسنا=وضاق ابن مشيب وضيقها عليه
الصراحه ودنا ماجت على آسنا=مير ماهي بالتمني ياعطيه
مادرس من لاعرف نحنو ولسنا=اترك ادروس الحياه العايديه
مادرسنا مثلكم لاكن قبسنا=نارنا من درس تجربةٍ قويه
علمتنا كيف نخرف ماغرسنا=وعلمتنا كيف حمل البندقيه
وعلمتنا كيف نسبح لاغطسنا=بالبحور الهايجه والغيهبيه
وعلمتنا وش نجيب اليا رمسنا=للمراجل بالليال الخرمسيه
وعلمتنا نحمد الله لا عطسنا=ولانزك نفوسنا لوهي زكيه
والردي بقدامنا فوقه دعسنا=ولايجي من رفقته غير الأذيه
ولايدنسنا ولو حاول دنسنا=ولايفور دمنا عشرين زيه
مير قله جيشنا يحمي حرسنا=بالرجال وفي سلاح المدفعيه
وقله انا لاهرجنا ما هلسنا=ولانجيب الا العلوم الواقعيه
وقله انا لاوقفنا ما جلسنا=لين نلحق شفنا والنار حيه
ومن لحاسة غيرنا ماقط لحسنا=ولانفكر بالهوين والبليه