للشعر فى ذكر المطاليق ميقاف= فهود الرجال اللي تشيل الثقيله
وسوق المعاني تختلف فيه الاصناف= ولاكل من دشه يصيد الجزيله
نوادره تصعب على كل عراف= ولاكل خيال يعسف الاصيله
الناس تحكمها تقاليد واعراف= والمدح يزهى بالرجال النبيله
تستاهل الفنجال ياشبل الاشراف= من بن صنعا فى يمينك نكيله
حلياك حر(ن) ماكره رأس مشراف= أخذت من شقر الحرار الفصيله

يامرحبا ياللي لنا صايغ القاف= كله شموخ وله معاني جميله
ياللي قطفت زهور شعرك لي أصناف= أنت قطفت زهور جني الخميله
أسقيتنا من رايع الشعر مرشاف= كنك جنيته من سحاب المخيله
العرف مايعرض على كل عراف= يالصاحب اللي مابغينا بديله
النادر اللي كاملات(ن) بك أوصاف= ياللي طبايعكم تشرف قبيله
ياللي لصعب القاف فارس وعساف= ياللي تجيد القاف مافيك حيله