لحظة زمن قامت الذكرى القديمه تعيد=ماضي وخلاني اسامر نجوم الدجا
وأشعلت نار القصيد وقلت هل من مزيد =ياهاجسن صار لبيوت الشعر منتجا
وان هاض بالي شعر ماهو بشيئاً جديد=شعري لاجل هيبته تاقف حروف الهجا
إما انحته من صخر والا انحته من حديد=وكل الشعر قد طرقت ابوابه الا الهجا
والله لمشيه في رايي ورايي سديد=ويمشي كما خيل قومن للوغى مسرجا
وش حيلة الشاعر اليا قام همه يزيد=يبرد غليله ليا جر اللحون وشجا
واللي فباله يترجمها فبيت القصيد=لعل يلقا من هموم الزمن مخرجا
والا ليا من شكا للناس وش يستفيد=إما عطب من جروح الحب والا نجا
واليا طرت لي هواجيس الزمان العنيد=بعض الهواجيس لامنه طرا مزعجا
احاول اسلى عسى كل الطواري تهيد=يمكن عن الهم قلبي يغفل ويدلجا
لكن!وشلون بسلى وانت عني بعيد=ياللي غرامك تمركز بالخفوق ولجا
إن كان شفتك حياتي كلها ايام عيد=وفرقاك يازين ضيقه جعلها تفرجا
حبك سكن داخل القلب وجرى بالوريد=وياكثر طاريك ماراح بخفوقي وجا
عنك استشف الخبر شقي والا سعيد؟=والشوق في وسط قلبي جمر متوهجا
عزالله ان لك فبنك الحب قدر ورصيد=ولافيك اصدق وشاه ولا كلام اهرجا
وان كان تبغي الصراحه والكلام الاكيد=همي علي اثقل امن جبال سلمى واجا
وان ما اوصله لااتصال ولارسالة بريد=مازال عندي أمل .مازال عندي رجا
قصيدتن من فكر عبدالله ابن سنيد=جملة مشاعر نضمهامن حروف الهجا