ياعاطف انقل ردتي والتحيه=للشاعر اللي فاز في بدع الامثال
شاعر قريناله بيوت ٍ قويه= عنده على معناه مخرج ومدخال
لو ماعرفته بالشعر بان ليه=لن الكلام الجزل ينبي برجّال
حافظ حفظه الله من كل سيه=والله يجيره من غدر كل محتال
ردة غلا تاصله مني هديه= من بعدها نشرح له العلم بالحال
الحال ماهي مية ٍ طبق ميه=ضاقت علي الحال ياطيب الفال
راع الوفا وشلون شال الاسيه=انا اشهد ان الوقت مخلف للآمال
شنّت عليه الناس حرب ٍ خفيه=من دون لايجهل لقا ناس جهّال
لك صاحب ٍ لونه غدربه خويه=مهما حصل مايقرب ادروب الانذال
الغدر دربه مالنا فيه جيه= حتى ولو تعرض عليّه بالاموال
انا لفعل الطيب مبغى وصيه = فيه طبيعه كلمة الحق تنقال
الجود والمعروق فيّه سجيه=عرقي بها موروث من جدٍ وخال
الجار عارف وش حقوقه عليه = ياتيه طيبي لو يجي منه بطال
والضيف يبشر بالصحون المليه= حلو النبا يلقاه مع طيب منزال
امشي به الدنيا على طيب نيه=لكن يبغضني خبيثين الاعمال
واشكي على اللي ما يمنّ العطيه= ومانام قبل اقرا تبارك والانفال
وصلي على اللي موته اكبر بليه=اعداد ماعدّوه بالين وريال

ياعاطف ارحب بالبيوت النديه=يامرحبا ماشالوا البدو موال
القلب يفرح بالبيوت السويه=اللي عليها تنكشف صورة ابطال
والاحمدي قدم لنا مزهريه=فيها وفا رجال واحزان وآمال
ابيات جزله فاتحه للشهيه=شهية الهاجس لتكريم الاقبال
من وسط همدان اقلعي يا اجوديه=طيري قصيدة ود بالود تختال
لدار ابو متعب وصول العنيه= ليد خالد سلمي حب واجلال
يابن عبيد اصبح نهاري عشيه=ماقلت هول وقد عمل فيني اهوال
صار الوفا يبكي بحضن الحميه=في سجن له حصنين واسوار واقفال
مثلك وفيت وكن هذي خطيه= مدري سواد الوقت أو سوء الافعال
راع الجميله ذوقوه المنيه=جميل يدي صار في يدي اغلال
صارت فعالي في عيوني غبيه=لكن شموخي ماقبل لحظة إذلال
بمحي طباعي من فعال البقيه=وابقى بطيبي مرتفع عنهم اميال
لنّي من اصلي ماعرفت الدنيه=يمض الوفا ويلاقي الصدر شلال
روح المروّه بالمروّه غنيه=لنّي سجنت الحقد في بند الاهمال
يا الله حي الجيد يا الله حيه=مثلك يشيله فخر والفخر ينشال
لا تلتفت دام التفاتك اذيه=ذي خطوته قدام للمجد وصّال
واصل على درب الطباع النقيه=وافهم دروس وخلها تسكن البال
وازكى صلاة الله تغشى نبيه=تعداد سير اجيال واجيال واجيال