ان كان يامساعد لتكـفـا بقـايا = تكفـا ثلاثمـيه وستـين مــره
تراي في وضعٍ غريب الحلايا = لا تحسب انه مزح والاّ تشره
به ثقب الابره من وساع النحايا = والحنظله ماتعتبر فيه مره
لولاي أعرف ان الليالي مطايا = يمشن بنا والعمر ياصل مقره
والخوف مابعّــد شبـوح المنـايا = لا جاب خير ولا يبعّد مضره
ولّعت توليع الغضـا بالشـوايا = في صوح ذعذاع" هبوبه تكره
بس أعتبر صعب المواقف هدايا = ومعاتبتهن عن خطايه مبره
ومن أجل هذا بالضلوع الحنايا = بدلت مفهوم المعانا مسره
لكن بدت تطلع شبوح الخفايا = ولقيت للحيّه على الباب جره
ومن نام بين مرنقطات الحيايا = يرتاع لو تدبي على الرجل ذره
وعوب السنين مقلّبات النوايا = فيهن لسمحين النوايا مغره
وكبود سودان الضماير ضمايا = وهفواتنا تصعدبهم للمجره
واللي سبوته ناشفات" حفايا = حوايف أقدامه تقل حصو حره
ماهو معدل نايفات الحجايا = على مشارفهن صعيب" ممره
وختامها مني سلام وتحايا = على شذا عنبر وموضوع دره