ياهجوس الشاعر اللي مايحيد اعن الصوابي = حضرً عندي نويت أشب في خشم الفتيله
لك سنه وشوي بالتحضير سجلتي غيابي = وخايفً كثر الغياب يجيب للشاعر فشيله

أبشر أني ماتغيب وأخذ مردود الجوابي = باللوازم ياعضيدي لك نجيب المستحيله
مير صار الشعر في تال الزمن مثل السرابي = وعن كثير الشعر بالميدان يكفيني قليله

يوم كلً متعبً خيله وأنا متعب ركابي = يشهد الله ماركبنا غير في ظهر الأصيله
والهزيله من نظمها مانظم غير الهبابي = لو تلمع بالذهب تبقى ماعنيها هزيله

كم ضعيفً لو نظم بيتين عداها السحابي = وأن ركب فوق الكديش يقول خيال الكحيله
والجزيله من نظمها مايلام ولايعابي = مانلوم إلا ضعيفً يحسب الهزله جزيله

دام كلً فاتحً للشعر والشعار بابي = المجله والجريده والقناة أفضل وسيله
من يبي للجاه جاب ومن يبي للمال جابي = والمصالح من بغاها لازمً يحزم شليله

من فتح بابه بمصراعيه يبشر بالخرابي = (ماخبرنا الهرج طول لحيةً ماهي طويله)*
قالها سبيل وقتً فات يوم القول طابي = عزتي لي من زمنكم كان ماجبتوا مثيله

ياهجوسي لاتزيدين المواجع والعذابي = لاتعيدين القديم اللي تقفى خلف جيله
الزمن هذا زمان العولمه والانقلابي = الغشيم يدل فيه وينجم راس الدليله

السوالف ياولد عيب وسماجه = ماتطول لحية ً ماهي طويله