سلام والمعنى فتقدير الاصحاب=بلسم جروح القلب ومجربينه
والمذهب أللي بيننا يغلق الباب=لاكان منهج سايره تابعينه
هاذي نعالجها بمعذار وعتاب=وراعي الخطا كل الخلايق تدينه
والثانية من بعد تفتيش وحساب= نصدر حكم حسب الذي شايفينه
بعد الحكم نقفل على كل الابواب=ويتصافح المطلوب ومطالبينه
ومن طاع نفسه وغر من ظبط الاعصاب=حقه يضيع أللي له مسعرينه
الحق مايوخذ بتبريم الاشناب=وهذا الكلام انته وانا خابرينه
في عرف ماهو علم مكتوب بكتاب=ورث الجدود وكلنا وارثينه
والبعض منا مكتسي منه جلباب=جدودنا في عهدهم مرتدينه
ما يجهله راعي مواقيف واطياب=وانته من أللي منهجه دارسينه
ولا بد ما للعلم ياماجد اسباب=مير الذي كل العرب عارفينه
انك رجل مرموق يحسب له حساب=معروف بين الناس ومقدرينه
لا يصير في خاطرك شكة وترتاب =قيس الامور وردكم محترينه