يامرحبا ترحيبة مضمونه = وهذه الالغاز يامدورينها
وشالفتاه اللي عملها بعينها = مع دورة المفتاح تذبح جنينها
تنفع وبعض اوقات مكروه نفعها= وبعض العرب ينقد على حاملينها
وانشدك عن بنت تغير بلونها = وتبدله خفيه على راي عينها
تاكل ولا تشرب ولاتنقل الخبر= ولاحد من اهل العرف يعرف رطينها
وانشدك عن بنت كرمها عذابها = وعيالها في شكلها مخالفينها
تدخل على الحكام ماتطلب الاذن= واهل اليدين الماهره هايبينها
ونشدك عن بنت توصف بعزمها = اغرب مافيها في حشاها يدينها
ليا منعت الدهن عنها توفت = وفي بارد الما في عملها تعينها
وانشدك عن زوجين والاسم واحد = اللي تسوي خير ونته تهينها
مطاوعه لامرك وتشتال حملها = تنقل وهي تعطف على حاملينها
وانشدك عن بنت جميل قبالها = تقابل الحسنا وتعلن بزينها
تحملك وتقلدك ونت تحملها = وتجاهل اللي واقف عن يمينها
وانشدك عن بنت كثير حضورها = وحضورها بمقدمة راغبينها
جوز ليا شفته وباسم مؤنث = وتزود النعمه على حاملينها
ووشبنت دايم شغلها هو عماها = ونحولها على عملها يعينها
تاكل ولاتشرب وكل قناها= ونجاحها منسوب لصانعينها
وانشدك عن عود يسارك بشاربه= وابنه تحت يمناك ما هو يمينها
ابكاه وصياحه وضحكه تشابهو = معروف في قاسي حياته ولينها
وانشدك عن رجل عطوف بشاربه = وكل البشر جمايله حافظينها
طيب وكل الناس ذاقوا فوايده = حتى وحوش البر يجبر جنينها
وانشدك عن عود اعروقه تجانبه = عدلات وعيال الرضا مجودينها
وكبار عياله كلهم وصط بطنه = وبنته تثبت روسهم وصط عينها
وانشدك عن ورع تزوره وتكرهه = في حلة ساس الشجاعه سجينها
تشاهده بالعين مانته بتقربه = لان فعوله كلها خابرينها
وانشدك عن عود برك في مكانه =في خدمة المخلوق نفسه يهينها
ثبت على رجليه واحتل موقعه= ياطالب الراحه تجي له بحينها
وانشدك عن رجال بالفعل قاطع = ياقف حمى بين العجوز وعنينها
لايمكن الرجل الغريب يتجاوزه = مادام هذ الرجل بينه وبينها
وانشدك عن غشاش تنفاه المدن = معروف في كذبه ونفسه يدينها
ياقف مواقيف الشجاع المحذلق = وينحاش عنك وعلته خابرينها
وانشدك عن بنت قليل جمالها = وعيالها بيدينهم قاضبينها
تشرب ولاتاكل ودايم ركوبها = على عجوز كلنا راكبينها
ووشهي فتاه جعله يطول عمرها = من كثر ماتعطي الملا حافظينها
منها سلاح الناس والخير منها = وفيها الحياه وربنا هو ضمينها
ووشهي فتاة كل حي ذكرها = جميع خلق الله يدرون وينها
كل الديانات الثلاث تعرفها = ومن حبها جميعهم ظالمينها
ووش هي فتاة شفتها عند راعي = هي قاسيه ويميز البنت لينها
قوامها ممشوق والجسم ناعم = وتفيد وقت اللازمه ناقلينها
وأنشدك عن رجلين في جسم واحد = بضاعة سمينها في ثمينها
والاسم واحد والمصادر تنوعت = وينفع بأمور بعضنا عاشقينها
ورجل ليا منك تلمسته أعتزى = في لهجة لو هي خطا فاهمينها
لو ترجمة يقول يارجل جنب = خل الدروب لعالم سالكينها
وأنشدك عن ورع يتعبك صيده = من أسرة بعض الملا جاهلينها
تضرب به الأ مثال في صعب مسكه = في بطن بنت ودايم هو جنينها
وأنشدك عن ورع ينادي المختفي = ومواقعه بين الزريق وكمينها
يستقبل الضيفان في كل ساعة =ويحول الشرهه على ناقلينها
ونشدك عن رجل لوى راس بنته= باوامر تجيه من مصدرينها
حتى يخلصها من اسر بنتها = وتبديلها يتم من فاحصينها
وبنت يجيها الامر من راس ورعها= وهي تامر أرجال لها مجانبينها
من فعلها تقضي حوايج مهمه = في بطن عود وتحت بنت تزينها
وانشدك عن رجل كريم مكرم = حسبت بناته كلنا خابرينها
وحسبة عياله عد حسبةبناته = وحسبة وجوده عد حسبة سنينها
ووش الحرام اللي نسميه طاهر = في ديرة حتى الاعاجم قطينها
اسباب تحريمه على شان بنته = وشحرم ام الخير يامحرمينها
وانشدك عن بنت توصف بعدلها= صنعة ارجال للطلب وازنينها
تفتيك باللي قبلها مانت عارفه = تقضي بها حاجتك في وقت حينها
وبنت تجود زادها في حنوكها = ثم ترسله تقصيد على خدينها
تسلمه بنت الخدين وياخذه = وتحت الاذان يجمعه عبر عينها
وانشدك عن رجل سمعنا بفعله = تميز براسين والموت بينها
في يد شجاع يخدم الدين مذهبه = باسم مميز ميزته دارسينها
وانشدك عن رجال طاعك وطعته =وعطاك من بعض الحقايق سمينها
اذا عدلته واعتدل صار عادل = وارضى عميلك بالقضيه بحينها
وانشدك عن رجال بالحق ملتزم = كل الرجال يجي لها حسب دينها
يعامل الكافر بكفره ودينه = ورعاية الاسلام بارضه يعينها
ياقف مواقف عز مع طاعة الله = واهل الفجر له موقف مع لعينها
وش هي فتاه جسمها من ولدها = ماتنوجد لولا تجمع بنينها
وليا مشوا بنينها ضاع جسمها = والفايده ترجع على ناقلينها
ووش هي عجوز كل ممشاك يمها = جميع سكان الفضاء واصلينها
من لا وصلها اليوم بكره يصلها = ومشوا لها ناس وهم كارهينها
وأنشد عن اللي يختلف عن سميه = مواقفه وقت الخطر مدركينها
اللي اليا جاء الجد تعرف مواقفه = والاسميه لعبة للا عبينها
اسمه اليا جاء بعكس معناه سالم = وفيه الحجر وبه قلعه عامرينها
وانشدك عن شجرة من الارض جذعها = لاهي نبات وموتها بيدينها
لاجماد لاحيوان لاصنعة بشر = ومن طبعها اللي حولها طايعينها
ياسامع لغزي تراها توفت = وناس تأ يدها وناس تدينها
وبنت تفيد وفي زمان معين = كأنها تعطف على مجالسينها
ومع فايدتها تنذر اللي يجي لها= تنطق يرمز وعلمها من خزينها
وانشدك عن ورع صغير مدرب = ياطا على اخته ثم يبيح كنينها
وياطا على اخوه الصغير بنابه = وهذي يغيرها وهذي يهينها
وانشدك عن ورع يدور ويشرى = يجي اجموع والبشر طالبينها
ليا عكست اسمه مهيمن وقاهر = واسمه فقط حرفين ياعارفينها
وابشدك عن رجال سمّوه كاذب = يسكب دموع كلنا مكذبينها
رجل يخاف وكل حي يخافه = له صولة تقضي على مواجهينها
وانشدك عن بنت بها مايسرك = اهل الوجيه الفالحه عارضينها
فيها بنات طيبات وحمّل = بعيال هم بالمبتدا مخلّفينها
وبنت تشيل اسلاحها وصط بطنها = ليا وجهت تقضي على مواجهينها
تقضي على خلق صعيب نزالهم = تقضي على السفاح في دمع عينها
وانشدك عن بنت عملها على الظهر = مترابط فيها قساها ولينها
ماتعطي المطلوب لولا عروقها = تحمل ومحموله على حاملينها
وانشدك عن بنت زهت في قرونها = تحمل اثنين ذكور معذبينها
عند الرجال اهل الكرم وعذابها = والقابضين حضور ومريحينها
وانشدك عن بنت جليسة نشاما = مكرمه بس اختها هاينينها
والثالثه لوهي عزيزه تحتها = صارن ثلاث مادخل شي بينها
ونشدك عن بنت تبرع بزادها = تطعم عجوز مسرفه من خزينها
تومر وتنهى ماتصرف برايها = ولها ولد يوصل ولد من كمينها
ووشهي فتاة تشتهر في عنادها = حتى انها ماتجامل معالجينها
الا بذيب بارزات اسنونه = اما تطيع الذيب والا يهينها
ووشهي فتاة شرّها لشر غيرها = تذبح عجوز كلنا مالكينها
تنفخ عليها نفخة الغيظ والغضب = حتى توفى ويتحرر سجينها
وانشدك عن شمطا قليل حلاها = جميع عقال الملا كارهينها
اللي كسبها مكسبه من خساره = واللي خسرها يشتكي حربينها
وانشدك عن بنت يريحك شوفها = ويوجد كثير من البشر كافلينها
مع البشر ربيعها هو ربيعهم = ومن طيبها كل الملا راغبينها
ووش بنت دايم ثابته في حماها = ما تشوفها وهي تشوفك بعينها
تفيد حاكمها بعلم يفيده = ليا جاه زاير حطته في جبينها
ووشبنت مثل الطوق باطراف ابوها = تكمل المطلوب لمكملينها
اللي مساحتها للاجواد ساحه = ما دامهم في عودها مثبتينها
انشدك عن بنت تبدل اعيالها =من شان يشفي فعلها ناقلينها
تقضي على الجمع الضعيف المسالم = ولولا ولدها ما نفعة مستعينها
انشدك عن بنت تعذب صغيرها = وتقطعه في مصلحة من يهينها
من راسها ترسل عليه المذله = حتى تثبت فيه من يستعينها
وانشدك عن بنت عملها بعالي = تميزت للي تخدمه بلينها
تجلس من بين اثنين هذا عملها = ومقاسها يحصر على حاصرينها
تركب ومركوبه وتلطف بغيرها = والمتضح من وصفها كبرعينها
وانشدك عن بنت مفيده ونفعها = للي بداخل بطنها ساكنينها
تاقف على الاقدام لكن مربطه = ومثبتات فلبسيطه يدينها
وانشدك عن بنت قليله اسنوعها = ناس تقبلها وترجع تهينها
في بطن ابوها ساكنه مع خواتها = حتى يظهرها من يدمر خزينها
وسألت عن بنتين واللغز زايد = على فتاة ربحت ناطحينها
باربع عيال مثبتين العلاقه = اعيال في بناتها واصلينها
ولقيت بالتاريخ رجل وحرمه = زوجين والحرمه وفت مع خدينها
من خبثهم كذبوا على الناس كذبه = لين انطلت على بعض سامعينها
يوم منعوا ركن بالاسلام قايم = لعينة توافقت مع لعينها
وانشدك عن رجال سموه طاغي = له حرمة دينه على غير دينها
حرمه تعوذ من بعلها بربها = ولربها ناجت بخافي كنينها
ووشبنت دايم ضربها بامر زوجها = والزوج يجيه الامر من وامرينها
ليا ضربت ظهر الذلول اجرحته = في راسها المحدود من صانعينها
وانشدك عن بنت ضعيفه جميله = دايم تحب الخير لمجالسينها
تسمر مع السمّار مادام زادها = ياصل لها وتكرّم مكرّمينها
وانشدك عن بنت بها الخير والوفا = لكن جهّال الملا مفسدينها
جميع ماتبغاه تلقاه فيها = في دبرة الله وهلها حافظينها
ونشدك عن بنت تفيد بعملها = وفعولها تظهر على مقتنينها
تاكل وتشرب بس ماتقبل الخطا = وشرابها يوزن من مشغّلينها
وليا ختلط شرابها هووزادها = تجلي عيوب اللي لفوا واردينها
وانشدك عن رجل على طول واقف = اما يسا رالبنت والا يمينها
بنت تجي وتروح ماتستعينه = لكن يعيبها على مالكينها
دايم وهي متجوده في جنوبه = حصانة منها على محصنينها
وانشدك عن بنت تريح جليسها = اخبث مافيها يوم تسمع حنينها
المزعج المبكي تتله وتبعده = ولاتتركه يحول بينك وبينها
ووشبنت دايم تنقل الخير والحلا = اللي تطيع وتحترم مرسلينها
ليا حمّلت طارت وسارت على الظهر = واستبلوها ارجال مودعينها
ونشدك عن بنت تفيدك بدمعها = ليا احتجتها جمعت عينك بعينها
ترسل ادموع لاجل توقف ادموعك = قولو وسشم البنت ياعارفينها
وانشدك عن بنت تأدي عملها = ابصمت وستعداد لمعاملينها
مكانها المعتاد بالبيت دايم = ودايم وهي في خدمة محمّلينها
وان حمّلت تبقى على الارض ثابته =فيها مثل تحقير ياحاقرينها
وانشدك عن بنت بها الخير والاذى = اللي تبكي بالرضا ذابحينها
مقطومة الراسين مردومة الخصر = مكروهة لونفعها فاق شينها
وانشدك عن بنت تقدر وتحترم = تحمل وتالد للاوادم بعينها
من شافها حامل عرف ويش حملها = ما هي بتخفي والملا مكرمينها
تطلع على العالي وتبدى عملها = والعارفين بضيفها رابطينها
وياويش بنت من قساها وقشرها = تحد ورعان وهم طايعينها
تحدهم دايم على العنف والقسا = واشيا لولاها كلهم رافضينها
وسألت عن بنت معروفه بغدرها = من مكرها تصطي على مواجهينها
يجي لها المغدور والنت لابده = كنك موصيها على زايرينها
وانشدك عن بنت تعلاك جسمها = وعلى الصديق اللي وفى نستعينها
تصغر وتكبر حسب رايك ورغبتك = والفايده منها على ناشرينها
ولقيت لي بنت تساعد وتطعم = وتحقق المطلوب لمصرفينها
يلبس بها العاري ويشقى بها الشقي = تحل وتحرم والملا عاشقينها
جميع ماتبغاه تلقاه فيها = وحتى تفيدك لازم انك تهينها
وانشدك عن بنت عريض ظهرها = وفت القسا الفتاك تحمي ضنينها
اضلوعها برّا وركبت جملها = على جملها اللي ثبت مثبتينها
وانشدك عن بنت تفيدك بعلمها = اطيب مافيها كلنا مصدقينها
لها عيال كلهم وصط بطنها = واكبر ولد بعيالها هو سنينها
تصدق الا ان كان صايبها مرض = وانواعها على طلب طالبينها
وانشدك عن بنت من الارض ساسها = وشدت وخلتها حجرها وطينها
لاتعيش في ارض ولاتسكن الفضا = وطول الدهر على الظهر عاكسينها
وانشدك عن بنت خطير لقاها = من خبثها كل الملا كارهينها
لو تنقتل ماحد يطالب بدمها = لان كل في عملها يدينها
تمشي بليا ارجول ويدين مالها = وتدخل ابيوت واهلها قافلينها
وانشدك عن رجل يعذب ضيوفه = وتصرفاته كلنا مرتضينها
اللي عذابه مصدره من عيونه = وغذاه من بنت عنه مبعدينها
وانشدك عن بنت تحرك وثابته = ارجول بنت ومثلهن هن ايدينها
اللي ولدها مختفي وصط بطنها = حرص عليه وهي مهان متينها
ولقيت حاره بها بيوت عامره = وعجزت لاعرف كم عدد ساكنينها
مساكن فيها جنود عواري = وادروب ساعات العمل سالكينها
وانشدك عن بنت بها الخير والرضا = من طيبها تفرض على فارضينها
يسلم بها المبلي ويدفع بها الاذى = الله يعز وينصر منفذينها
وانشدك عن بنت ليا حل ذكرها = تذكر فوايدها ويذكر طنينها
ليا كمّلت دوره تبين عملها = والطامعين بنفعها مراقبينها
وانشدك عن بنت سببها جلبها = اهل التلاوة والرجا منفذينها
ليا مرّها اللي طالب طاعة الله = نفذ لها مطاعة الله بحينها
وانشدك عن بنت فليل خطاها = لكن تخطي من خطا محاسبينها
ليا طلبت العلم تعطيك نانتجه = وطعامها اللي تقبله هو ضميتها
وانشدك عن بنت بعيد مغزاها = بنت الفرج والبنت الاخرى عوينها
تحيب من بطن الحبيبه حبيبنا = الله يكثر بالحبيبه خزينها
وانشدك عن بنت حسبنا حسابها = ضمن اربعه واهل الرجا حاسبينها
ليا شرفت فالخلق يخاف منها = تذبح جنود ويختفي خايفينها
وويش البنات اللي ثلاث عددهن = ولكل وحده وصفة عارفينها
الاوله باسم ذبح من يذوقه = والثاني اجسام الملا هو كنينها
والثالث اللي يرفع الضغط فعله = وعنهن يفيد من المباني حصينها
وانشدك عن بنت لها حكم صارم = وتصدر احكام العداله بعينها
تقول لك حاسب ووقف وروح = ومن عدلها تحكم على حاكمينها
وانشدك عن بنت هذا زين نفعها = تنصف ان كان اهلها منصفينها
مما بها تنعشك واللي بوصطها = مما يرد الرو ح صافي سمينها
ووشبنت اليا حصلت ثنتين منها = كاسب ومن زادوا بها خاسرينها
هي سابعة سبعه ولافيه غيرهم = ومن بينهم في ديننا مقدرينها
وانشدك عن بنتبن في جسم واحد = وتصير بنت بصّرت سامعينها
صارت لطرّاد البلاوي قلاده = كنه يقول اللي تشوفين وينها
وانشدك عن بنت تزوج وتالد = تزوجت يوم اهلها مزوجينها
تاكل وتشرب والقريب يعرفها = مثل البشر توصف وتنظر بعينها
وانشدك عن بنت تحكم بغيرها = وبا اشكال ونواع تخدم مالكينها
بنت لها بالمدن والبر فايده = واللي مخزنها يفيده خزينها
وتفيدنا بالبر والجو والفضا = وساعة تعاملنا بها هايبينه
ونشدك عن رجل على طول صامت = لكن اعلومه بالرضا قابلينها
حتى لوانك عالم الارض تنشده = ويعطيك من جزل السوالف سمينها
ونشدك عن بنت تحطك بعينها = وبالعرف والمعروف تصبح خدينها
فيها الشجاعه والوفا والامانه = ومن طيبها المعروف تحفظ سجينها
ماحصلت تهديه على ولدها = وتحتاج لاشيا في عملها تعينها
ونشدك عن بنت لاهلها غنيمه = واهل ا لنفوس الخاسره رافضينها
يكسب بها واحد واهلها ثمانيه = ومن ضمن اهلها من البشر ناقلينها
ترتيبها الثالث وتاثيرها النما = ونكارها شر على منكرينها
وانشدك عن بنت تبهذل وتحكم = من حاكم يحكم على معذبينها
يسومها العذاب من رام بعدها = عن موقعه وبكل قسوه يهينها
دخولها في بيتها هو هدفها = وشروطها يلن بها محكمينها
وانشدك عن بنت تبين لك الخلل = في دبرة ارجال لها دارسينها
تحكموا فيها وجابوا خبرها = نتيجة للي سأل عارضينها
واللي سأل فاحص ويبغى نتيجه = نتيجة تخفى على ناقلينها
انشدك عن بنت يمثّل بصغرها = ولها فعول ماحد يستهينها
اللي بها الخراب والششر والاذى = وحيان منها خير لمعاصرينها
ووشالفتاة اللي على الصدر راكبه = طوق على الاعناق لمركبينها
لياحكمت يجري على العنق حكمها = من فوق ابوها والبشر حاكمينها
تمت عساه يوفق اللي كتبها = وعليكم التقييم يامقيمينها