يالله ياخلاق يامصرف الكون=يامدبر الأفلاك بالكاف والنون
عبدك مقر وماضي بحكم مسنون=يستغفرك يارب من كل الآثام
دنت هجوسي بالمثايل والأفكار=في هجعة النومان في وقت الأذكار
قمت ألتجي بالرب في كل ماصار=وعبد يناجي رب الأرباب مايضام
لديت عيني فالثياب الستيره=واتبدلت من ضافيات لقصيره
قالت معاذيري ظروفي عسيره= وأنته نعدك من رياجيل فهام
الوقت هذا نداري الناس بحساس=ماودنا نشبك سلوك الرضى بماس
انسايس المجنون ونقول لا باس=ونغير الأحكام بأحكام وأحكام
رديت ماني من رياجيل يرضون=بالدون راع الدون منزاله الهون
أنا الذي يمشي على حسب قانون=مايختلف رسمه وله نهج واحكام
وإليا اعترضلي خبل ماني مجاريه =والجاهل أبعد عن مجاله واداريه
وإليا نصاني عاقل بزور اداويه =وآخر دوى بالكي في شرع الإسلام
ياقلبي ياللي صرت وسط المحاميس=لايهمك أصحاب الردى صحبة ابليس
أنته مكانك فوق راعي نواميس=أدراك عن هرج المتاعيس الأقزام
ساسك مجود جودوه الجدودي=أهل النقا والطيب حرش الزنودي
تاريخيهم معروف مابه جحودي =محد حجب شمس الضحى بروس الأقلام
هذا زمان شفت فيه العجايب =طير الحمام يصيد صقر النوايب
حتى غدا راسي من العلم شايب =من عاش يجرب كيف تقليب الأيام
اعطتني الدنيا دروس وبصيره=والعسر له يسرين خير وخيره
ومحال تصبح عين دايم قريره =بين الفرح والحزن نرقى للأعلام
من يامن الدنيا تراها تغره =ابها تعشى اليوم ويجوع بكره
والمنكسر يمشي ليا شد جبره =واللي بنى بيته في مسيال ينلام
ماينفعه كثر المدايح بتطبيل =قالوله أنته شيخ ..شيخ المهابيل
حتى غدا غرقان في زومة السيل =ومحد ترحمله ليا طاح ما قام
أحفطك ياراسي عن اللي يعيبك =مانته هدف مرصود كل يصيبك
ولاحد يوديك بعلوم ويجيبك =مثل الجبل معروف فاليمن والشام
دايم مقدم فالعلوم الكريمه=اللي سوايرها سواير سليمه
لجلك مع ربوعك في وزعه وشيمه=لك عز يارسي ولك قدر وإكرام
البحر الاحمر ملح كله أجاجي=مايروي الضميان شرب الهماجي
والنيل حلو الطعم فيه ابتهاجي =عذب قليل أخير من ملح لطام
وختامها صلو على خير مرسول =محمد المختار بالطيب مجبول
أعداد حلو الطعم في غصن محمول =بديت بالرحمن وباسمه ليا اختام