تستاهلين اللي جرى يالحيتي تستاهلين = لاني وثقت بواحدٍ ماهو بكفوِ للثقه
غرتني الكشخه وحلو الهرج في عبد المعين = ماكنت اصدق فيه من حلو القبال ومنطقه
اثره مصلحجي رقم واحد وشين بقو عين = ميت ضمير من الحيا مغسول وجهه بمرقه
يبدي لي الطيبه ويخفي عني الحقد الدفين = الكحل لامنه لقى فرصه من العين سرقه
وانا على نيه من الرحمن واثر ابن اللذين = يضحك معي بلسان مايخبر وقلبه محرقه
لكن ابو نيه غلب راع الحيل والنيتين = اللي ماهو لله يضيع وينفضح من لفقه
جمالةٍ في غير اهلها نقص يالقلب الفطين = تصبح هبا منثور لاترجى ولاهي بصدقه
مر التجارب علمتنا الغث فيها والسمين = هالحين راع الطيب من راع المصالح نفرقه
العقل نعمه والتجارب بعدها كلش يبين = ماعاد تخدعنا المظاهر والحكي والزبرقه
المؤمن من الجحر صدقني مايلدغ مرتين = عقب الحذر مايوخذ الا اهل الردى والنقنقه
ومن بعدها تستاهلي يالحيتي لو تاثقين = الا برجّال كفو يشفق على الطيب شفقه
متسلسلٍ بالطيب من روس الرجال الطيبين = كلٍ ينّعم له على طاريه والله وفقه
العلم واضح والرجال رجال والمعنى ثمين = ماهو صحيح يشبه الحر القطامي بسلقه