يا مل قلبٍ هموم الليل تحتله = إليا اقبل الليل جاء همه وطاعونه
الناس ناموا وأنا كني على مله = مدري لذيذ الكرى يامنيف وشلونه
يا منيف هات القلم والبوك والدله = والرابع اللي على بالي تعرفونه
اليا صفا الجو لي ولا بدا خله = يا زين رد المثل والقاف يا هونه
سجل كلامي لابن رداس عبدالله = الشامخ اللي على ذكره يعرفونه
حلال ما يقصرون الناس عن حله = واليا عقد عقد ما ظني يحلونه
ما جابن البيض مثله خص لا والله = عندي وكلٍ على ضنه بمظنونه
ما قول حاز المراجل دون خلق الله = كلٍ شرابه على ما قيل بحفونه
مار أمتساوي حسب ظني على السله = متربعٍ فوق راس الطيب ومتونه
أنا أشهد انه شجاع وحصله كله = يوم العرب كل طايل ما يطولونه
ريف الضعيف ليا منه تبين له = ليا صكوا الباب والبواب من دونه
يدحم بروس المناكب لين يأصل له = حتى تهيا مطاليبه ويعطونه
ليا طلب مطلبٍ منهم تسهل له = عن ما يبي بالدوائر ما يردونه
كلٍ يجيله على ذكره ويدله = مثل الحيا الناس يا نياف يتلونه
عز الله انه فعل فعلٍ على حاه = لعل بعض العرب بالروح يفدونه
يعل يفداه من دور بدل خله = الصاحب اللي بلوفه ماهي ما زونه
شذب العراقيب والتعليق طبع أله = دايم لسانه تقل حذاف طاحونه
والله يالولا الحيا يا منيف لادفن له = وأظهر علومٍ زمانٍ فات مدفونه
حتى يجنب طريقي ريس الشله = واللي يجنب طريقي ما أعترض شوونه
بالله يا مرسلات الصوت قولن له = لا يعترض بالنحر وأدق ليمونه
أنا ليا قلت قولٍ ما أقبل الذله = ماني من اللي خبول الناس يا طونه
تصرفاتي على كبد العدو عله = أصنفر البلف لين يطير كربونه
واليا زمالي زميت بعالي التله = مانب محابيه مثل اللي يحابونه
والله لاحده على قصياه وأدبل له = حتى يشوف الهزيمه شوف بعيونه
الشاعر اللي يكد الراس ويفله = عقب تبين تخفا ما يشوفونه
كان المهبا نواني بالردا قله = ماني محرج على ديكٍ بكرتونه
يمكن هدومه عقب ما فات مبتله = ما ظنتي ينظفه كرتون صابونه