البارحه نفسي على الله حالها = غيّم سماها واشغلتني بحالها
تلعج بروق الضيق بالهم والعنا =وضاق الفضا والنفس ياشين فالها
وان قلت يانفسي على الله اصبري =قالت تعبت ايامكم مع ليالها
اصبر واجامل والصبروش فوايده =دام الاجابه ماتطابق سؤالها
اليوم صبر باح كثرت روابعي =ومثلك يعرف النفس لاضاق بالها
واقول يانفسي حياتي رموزها =خلني ماعرف شرقها من شمالها
ودنيا العنا ماينعرف وين راسها =تخالطت برجالها مع رذالها
امر يحيّر كل عاقل بوقتها =عقول البشر منها تزايد هبالها
وقتِ غريب مافهمنا غرايبه =دقاقها متخالط مع جلالها
الوقت شيّبني ونفسي تحطمت =وغاب الامل والارض ضاقت سهالها
واسباب من عكر على النفس جوها =وخثرب مشارب صافيه من زلالها
رجل احسبه بالوفا مد ساعده =وكنت احسب انه للحمول ارتكالها
ودارت بنا الايام وبانت فعايله =وطاح وتردى بكلمته ماحتمى لها
وبانت عمايل من هقيته على الوفا =ان الرجوله في يدينه حبالها
وخابت هقاوي في ضميري تصوّرت = ان االصداقه في فعوله وصالها
مديت له يمنى الشرف في لزومها =وجلست انا بالشمس وهو في ظلالها
ومالوم هقوه دام مااعلم بغيبها =ولا لوم نفس ماستراحت بحالها
ولالوم صدري يوم ثارت خزاينه =دام العضلّه خيّلت بي خيالها