الشاعر هواش بن عايد السليمي (نايف ابو عفريته)
رداً على الشاعر محمد الحداري الذي منها هذا البيت
ياعيال ياللي تفهمون الوصاتي وصية اللي جرب الوقت تجريب
قصيدة هواش :هي كما يلي
يابو فهد قافك نصاني بذاتي =غفلت والأيام معها نشــاشيب
وانا احسب ان ايامنا مقبلاتي =واثر الليالي معطيات العراقيب
اللي مظى بالقوه اخذ طـراتي =واسابق السرحان روس المراقيب
واليوم اقوم اليا ارتكيت بعصاتي =شانت مشاريبي و زانت مشاريب
واخاف من دياني اليوم ياتي =وانا مفلس خالي الكـــف والجيب
ياقف بظيق ولايجي بسعواتي = ولا يفهقه عنــي كثير الأصاحيب
صح الصحيح ولحفوني عباتي =قليل لين ايكملون المطاليــــــب
يبكي بعض ربعي ويبكن بناتي = ومن غب هذا يضحكون النحاحيب
وانا شالوني يم داري حظاتي =لقيت ماقدمت مخطيــــه ومصيب
مرصود لي به سيتي واحسناتي = لا ازود بالحسنه ولا انقص من العيب
يالله يامخرج جميع النبــــاتي =يارازقٍ بالجو عكف المخـــــاليب
ياللي بحكمك تمشي الراسياتي =يوم الحساب ويوم نشر المكاتيب
ان وقفوا عندك حفـاتٍ عراتي = يرجون عفوك بين مسرور ومريب
يرجي شفاعت سيد الكائناتي =حتى العرق معهم تعدى التلابيب