هاذي ثلاث ايام والريح غربي=وضرت شفاشيف شجرها مشافي
تنسف على روس المراقيب تربي=ونص العدود تصيبها بالجفافي
سلام للعزام من عند حربي=اهلاً هلا يوم المعاوش أقضافي
سلام احلى من لبن بكر عربي=لاهل السلوم مشيدين الرفافي
ياما نصاهم من بعيد وقربي=هجن مواجيب عليهن هجافي
ياريف من بلواه تزداد كربي=وحيد يحدى بالحديد الرهافي
اشكي وابي جهالكم تعتبربي=والا الرجال يثمنون القوافي
لو كان فعلي زان حظي قصربي=انا نقصت وصاحب النقص وافي
ياهل المروه ماغدا من قطربي=ماخفي عليك ولا على الله خافي
اللي نتاجر به من اول تجربي=وانا صعب والوقت زين عسافي
والحقد والبغض الدفين انتضربي=والحظ جندي من جنود المطافي
شبيت ناري من غضب مستعربي=وجاب المطافي لين صارت عوافي
وليا تبادلنا الشتايم ظفربي=عندك خبر كيد القوي للضعافي
نظرت طليب ليا طليبه نظربي=وعن بيقته مايظهرني خفافي
حظي عن الماء للماضي صقربي=وارد حتايف ييبس الاشافي
وفي مثل بيت العنكبوت اختصربي=وسجل عليه زلتي باعترافي
ومن مجتمع حي لحالي ظهربي=ويوم التفت ليا ركابه مقافي
كل الليالي منسدح لي بدربي=ويوم أدبرت معيه يطق الدفافي
وانغبت عن حلف الشوايا حضربي=ويغيب عن الخير على الناس ضافي
أول يصالح والسنه ذي غدربي=قلط لي الذرنوخ مع ذوب صافي
حسيبه الله للمهايف شهربيومن=الطفوف يدفني مع مهافي
صايم مصلي مير حظي كفربي=بين القضا والصوم جود كتافي