يا نور بـن نفـاع بلـغ سلامـي=حمس بـن بتـلاء وقـل للجميلـي
ضيف الله اللي بالشدايـد حسامـي=أضرب بحده كـل سيـف صقيلـي
وأنتم فخر مجدي وجوهر حزامـي=اظلال في صعب المواقـف ظليلـي
يا تاج رأسي عزوتي يـا إوسامـي=ويشهد على النطق الصريح العسيلي
ورباح يشهد لـي بصحـة كلامـي=وحجر المزكي وبـن ناقـي كفيلـي
إذا قلت ربعي هم سنائف عظامـي=مهما مدحت وقلـت فيهـم قليلـي
وإن قلـت حبـي للقبيلـه إلزامـي=ماله بعـد ربـي ودينـي عديلـي
حربي وتملك كل حـرب اهتمامـي=وأبني من الماضي جديـد المديلـي
ولا أقول حام أطيب من أخيه سامي=قبل الرحيل أحسب حساب النزيلـي
يا نور بلـغ يـا شبيـه القطامـي=ابن الأصيل وقـل لأبـن الأصيلـي
بلـغ تحياتـي ورمـز احتـرامـي=وانته بتوصيـل الرسالـة وكيلـي
سلامٍ أحلـى مـن بخـار الغمامـي=اللي على صم الصفا لـه مسيلـي
على الكبود اللي على الماء ظوامي=من لاهب الجوزاء طواها المقيلـي
كلمة وفاء من خاطري وانسجامـي=وتجاربـي بأهـل المـروه دليلـي
أعرف موازين الذهـب بالجرامـي=وأفهم كلام ما نطـق بـه زميلـي
وأنـا إذا غنيـت مانـي غرامـي=أخصـص المعنـى لفعـلٍ جزيلـي
وإذا بنيت القاف صـورت أمامـي=صلب الهدف لين الهدف يستويلـي
ولا أقوم الحجـة علـى الإتهامـي=أخلـي البرهـان دائــم خليـلـي
ولا أبني جداري فوق ساس هدامي=ولاني بأصدق كـل حكـي حكيلـي
أحسب كلامي قبل مأبـدئ كلامـي=واكسر وأجبر بين عدلـي وميلـي
وأبيع وأشري والجزيلـه مرامـي=وللحق وما يلحـق متيـن شليلـي
وإذا مسكت يمناي حبـل الخطامي =بعت وشريت بحجتي مـع عميلـي
أمـا ضربـت النافـذه باللحـامـي=والا بديـت بقـاف زيـد الهذيلـي
يا نـور منكـم كـل علـم تمامـي=أديتـم الواجـب بـوزن ثقيـلـي
يا أهل المقام بواجب أهل المقامـي=بذلتـم المجـهـود والمستحيـلـي
للـي يقـدون السلـف والجهامـي=اللي لهـم بالمجـد بـاع طويلـي
جبلو على الشيمه وحشم الحشامـي=وتاريخهم جسره عميـق وجليلـي
قومٍ لهـم هيبـة نهـار الزحامـي=يوم إن كـل مـن ذراعـه يكيلـي
قوم يشيلـون الحمـول الجسامـي=ميراث جيل وارثـه عقـب جيلـي
قـوم إذا قيـد الجمـل بالخزامـي=صلبين الأريـاء محتميـن الدبيلـي
إذا صار من بن الحثيث انقسامـي=وخيل جفيل وخيل منهـا الجفيلـي
إذا صار عج الخيل مثـل العسامـي=وسلاحهـم عـود القنـا والفتيلـي
يردون حوض الموت ورد الحيامـي=إذا هـاب ميقافـه ابنـاخ الذليلـي
على النظـا ومكاضمـات اللجامـي=كم شيـخ قـوم جرعـوه الغليلـي
وشهودها القـاره وحيـد الردامـي=والوادي اللي صوب مطلع سهيلـي
وكم واحـدٍ وقـع لهـم بالبهامـي=لو أن قلبـه مـن طناهـم عليلـي
والكامل اللي له تصـوم الصيامـي=وأنا كتبت إيجاز عـن مـا رويلـي
تمت وذكـر المصطفـى بالختامـي=عليـه صلـوا والختـام تهليـلـي

قـول سمعتـه شـوق النفـس مبـداه=حي الكلام وحي مـن قيـل مـرزوق
كلام مـن وجـدان شاعـر سمعنـاه=ونويت أعلق لي مع الحثـل معلـوق
مـرزوق يستشهـد بنـا لا عدمـنـاه=على الكلام اللي من الطيـب مسيـوق
وأشـار للماضـي ولـو مـا تقصـاه=لا شك جاء من يمه العلـم مـا ثـوق
وأخذت مـن قولـه صوابـه ومعنـاه=وأجبت لو إني على القـول مسبـوق
يا نور يا للـي قبلـي الحثـل نـاداه=يا نور يوم إسمك من النـور مشقـوق
يا طيب من مـا كـره طـاب مجنـاه=متبين للطيـب فـي رأسـي شاهـوق
بلـغ ثنانـا كــل شـهـم عرفـنـاه=من أي القبايل كل طيب لـه إحقـوق
وخص الرجال اللي كرمهـم لمسنـاه=وتعاونـوا معنـا بنـيـه ومنـطـوق
يوم إن مهدي كـل مـن جـاه ينخـاه=إبنه سجيـن وخافقـه تقـل مأسـوق
تقديـر لظروفـه مـن البعـد جينـاه=من نجد سائقنا الوفـاء يمكـم سـوق
جينـا لحـق خصنـا مـاأعترضنـاه=وقمنـا مقـام بأهـل الشيمـة إيلـوق
قمنـا المقـام اللـي القبيلـه تمـنـاه=مقام يملاء النفـس بالفخـر والشـوق
بجمعٍ علـى أقطابـه تيمـم بممشـاه=دار الأمير اللي لـه الخاطـر يتـوق
ذاك الأمير اللي أكثر النـاس ينصـاه=اللي حوى المعروف والعرف والذوق
خالـد إليـا رد أول العلـم لا تــلاه=له موقفٍ مـا يأقفـه كـل مرهـوق
ملاذ مـن كبـرت بوجهـه قضايـاه=من دونها يـروي شبـا كـل مذلـوق
يوم أخفقت كـل المساعـي نصينـاه=بقضيـة مـا يضمهـا كـل صنـدوق
يـا نـور كـل دون حقـه وصايـاه=والناس مثل الناس لو بينهـا إفـروق
والديـن والدنيـا شريعـة مـسـاواة=لا شـك كـل لـه تقاليـد وإطـروق
خص ابـن بتـلاء بالسـلام وتقصـاه=اللي خذا طيبـه تجاريـب وإعمـوق
قل يا حمـس مسياركـم مـا نسينـاه=لا شك دون إحقوقكم حالـت إحقـوق
ربــع مجمعـهـم لـهـم حملـنـاه=من الشمال ومن شفا نجـد وإشـروق
يوم إنـي أوسطهـم مكانـه وملجـاه=لو غبت عنهم صرت مخطي ومحقوق
وإلا أنت ما قصرت يا معرب الجـاه=وخصيتنا عساه مـا يخصـك العـوق
وابـن مريخـان الحميـده سجـايـاه=ضيف الله اللي مع الطيـب طـاروق
من فطرته وإلا هـاك العـود وصـاه=ما جاك من يمه ذراء البيـت مفتـوق
وخص ابن راضـي بالثنـا لا تعـداه=ذاك الرفيق اللي من الطيـب مرفـوق
مـن يـوم جيئنـا مالـك الله فقدنـاه=هاك القبايل اللـي بعيـدٍ عـن البـوق
وخص البقمـي اللـي كريـم محيـاه=عطه الثنا من عندنـا الطـاق مطبـوق
ثامـر تليـد المجـد يشكـر بمسعـاه=تسعين نعـم فـي مذاخيـر مـرزوق
لـه موقـف يرفـع مقامـه ويزهـاه=دون الصديق اللي من الوقت مزنـوق
وربـع لنـا يـم الجنـوب وقـريـاه=حروب بميدان الكرامـه لهـم سـوق
تصـدروا هـم القضـيـة بمـبـداه=أهل صدر ماحقهـم بالوفـاء لحـوق
نعم الرجال اللي على حقوقنا عصـاه=اليا صارت الدنيـا ملازيـم وحقـوق
قامـوا مقـام يرفـع الـرأس طريـاه=وأظفوا علينا من جميل الكـرم طـوق
ما أقدر أخص فـلان وفـلان حليـاه=ويصير في قولـي مداخيـل وإفتـوق
يـا نـور لنـا معجـزات مسـمـاه=ومن دوحة الشيمه لنا فروع واعـذوق
الطيـب لنـا فيـه جـلـه وعلـيـاه=ما طيبنـا هرجـة بلاعيـم وإحلـوق
والجار عـن ميـلات الأيـام نـداره=شف قصة البشري بها العلـم موثـوق
كن المهادي شـق لـه مـن مزايـاه=لولا الخبر معروف تقـول مسـروق
تشابهت قصـة هـل الحلـم والجـاه=قصة مثـل قصـه وقايـع ومنطـوق
بس المهادي جار جاره علـى إنسـاه=وهذا سبب خطله من يديـن مطفـوق
جار غريب وشاف له ظبي وأخطـاه=وأصاب جـاره جعـل يمنـاه للعـوق
وزبن على البشـري وخصـه ببلـواه=قدام لا يـدري عـن العلـم مخلـوق
وقام الأمير اللي أبيض العلـم ينصـاه=ونادى على ربعه وقال إجمعوا سـوق
ويوم إجمعوا خمسين وضاحـاً محنـاه=رفع برأة الجار فـي رأس صعفـوق
وأبو القتيل أظفا على الجـار حسنـاه=وأعاد لربعه ما جمعوا له من النـوق
ونويشي اللـي خلـد الوقـت ذكـراه=له مركز في قمـة المجـد مرمـوق
راع النقـا زاح المـلامـه بيمـنـاه=دون الخوي ما يلحقـه كـل محلـوق
قص أربعه واثنيـن والسابـع أعيـاه=بقطع اليمين اللي على الجنب مطروق
ودخيل له جار علـى الهجـن خـاواه=في غزوة لامـن سلامـه ولا وفـوق
الضيغمـي سلـط عليهـم سـرايـاه=وشبك حـرار مـا بسيقانهـا إسبـوق
وقال البلالـي ذا خويـي وأنـا فـداه=موتي بعـز ولا حكـي كـل زاروق
هـذا أجنبـي وأمـه ورانـا تحـراه=مودعتني وأوسط الجـوف محـروق
وخلف ربيـع اللـي هـزال مطايـاه=بنـا لنـا بيـت مـن المجـد منتـوق
لـه بالكـرم ذمـه وقمـه ومثـنـاه=وله به مقاضب سيف بيديـن فـاروق
ويوم السنين اللي ما تذبح بهـا الشـاة=مخيمر المطلق قراء الضيـف بالنـوق
ذبح معواده ولف غربه على إرشـاده=ولا ضيعه من يرزق الخلق من فـوق
وأبالشيـم حجـرف قليلـه حلياه= اظن مـا سـوى سوايـاه مخلـوق
له بالكرم مشوار مـا تلحـق إخطـاه=ومال يطب إمراح أبو زيـد ممحـوق
هاذي نمـاذج مـن شيمنـا المزكـاه=يشهد بها عاتق علـى أخـوه معتـوق
واللـي نوانـا بنيـة الخيـر يلـقـاه=وعدونا عينـه لهـا الشـب مسحـوق
واليـا تحـدانـا خصـيـم قصيـنـاه=عقب السعة يصير في مذهبه ضـوق
يـوم القبايـل سلـم المجـد تـرقـاه=مـا يعترضنـا دون مرقـاه خـازوق
عسى السحاب اللي يغيث الوطن مـاه=اللي عراقيبه بهـا إرعـود وإبـروق
اللي إليا منـه ضـرب وادي أسقـاه=نو من الوسمي علـى نجـد مدفـوق
يظفي على دخنه إلى أطراف الأقفـاه=وما ترفع أغباشه إلى أطراف ساحوق
دار لنـا بـيـن القبـايـل مـحـلاه=ماجت عطاء جتنا ثمن سرد وإعـروق
يـوم إن كـل دون حــده بشلـفـاه=وإرماح تثنـاء بيـن زارق ومـزروق
الله مـن خصـم بغـاهـا ولطمـنـاه=لطم المحيم اللي عن الحوض مصفوق
عدونـا إليـا اشتـد عـوده كسرنـاه=ويرجع معيف وهو على الخشم مطقوق
يـوم الزمـان اللـي كثيـره رزايـاه=صلنا وجلنا وأكثـر النـاس مفهـوق
بوقـت مخاليـب المنـايـا عطـايـاه=مثل الأفاعـي بـس نيبـان وإشـدوق
وقـتٍ إليـا منـه عطانـا عطيـنـاه=وإن شأن ما نلبس به الثـوب مبنـوق
يـوم لنـا ويـوم عليـنـا خطـايـاه=وأيام بلواهـا شكـا ضيمهـا صفـوق
وضاري وأبوتايه وسحلـي وجهجـاه=غير الثقيل اللي نزل نجد مـن فـوق
اللـي عبـر نجـد جفيـل رعـايـاه=ما تقل يلقي في شفـا نجـد زملـوق
كـن الذيابـه عـن مشاهيـه تنحـاه=إليا ما تعدى رجـم هدبـان والطـوق
هـذا الكـلام اللـي عليـه المثـانـاه=بالحق مـا نـداري إعدنـا ولا نبـوق
قبيـلـة لـنـا محبـيـن وإعـــداه=يجبر بنا خاطـر ويسهـر بنـا مـوق