اليف الا يالله عبدك ترجاك= وبكى وهلت دمعته يوم ناجاك
يارب تغفر زلته يوم يلقاك= ومن يغفر الزلات غير انت يالله
والبا بنادم لو يفكر في حاله =نهار يدفن في المقابر لحاله
ويترك وراه أمه وابوه وعياله= يعيش طول العمر مايعصي الله
والتا ترا دنيا البنادم تغره =وان طاعها فوق المهالك تجره
والفذ مايمشي بدربن يظره=وأللي يظره كل ما يغضب الله
والثا ثرا عمر البنادم صلاته=واحسانه أللي يفعله في حياته
العبد ما ياخذ معه في مماته= غير السوايا أللي يقابل بها الله
والجيم جربت المعارف والاصحاب =ولقيتهم مابين صادق وكذاب
وأللي غريب أخير من بعض الاقراب=وهذي نتيجة تجربة يشهد الله
والحاحذاري من ضحك لك بسنه=تطاوعه وتمشي معه حسب ظنه
في القلب ماتدري وش أللي يكنه=أللي في جوف القلب يعلم به الله
والخا خويك لوحصل منه زلة =أصفح عنه واصحى تجي منك خلة
وعليه لا ترضى الاذىوالمذلة=وراعي الوفا والطيب أجره على الله
والدال دور صادقين الصداقة= وابني معاهم بالمودة علاقة
واللاش لاتزعلك ساعة فراقه=بعض العرب عن صحبته يغني الله
والذال ذنبك معظمه من لسانك=تحرق بناره وانت جالس مكانك
ان ماترده عن هوا النفس هانك=وان جاك ما يغضبك قل حسبي الله
والرا رجال العرف خلك معاهم =ان كنت تبغى توصل لمستواهم
ولابد لك من يوم تصبح كماهم= ومن يطلبون الله يعطيهم الله
والزا زمانك عيش به صبر وكفاح=وحذراك تتندم على شي قد راح
الرزق عند الرب خلاق الارواح=الناس تبذل جهد والرازق الله
والسين سرك في ضمايرك كنه= وقيس الرجل بالفعل ما هو بسنه
وعطاك من بعد العطا لاتمنه=وعند العرب قبل السلام اذكر الله
والشين شياطين العرب خاف منهم=من قربهم أحسن لك البعد عنهم
كم فرقت بين القرايب فتنهم=واصحى تماشي ناس ماتتقي الله
والصاد صواب القول قول الشهادة =الركن الاول من اركان العبادة
وتلاوة القرآن فيها الافادة=ومن يحفظون الذكر يحفظهم الله
والضا ضيوفك لا لفو في مكانك=رحب قدر مايستطيعه لسانك
وان قمت في واجبك مولاك عانك= الضيف ضيف الله ووصى به الله
والطا طريق الخير خله طريقك=وادعي عليه ابنك واخوك ورفيقك
ولو سار بالدرب المعاكس شقيقك=مامعك حيلة فيه والمهدي الله
والظا ظهرت في زمنا عجايب =متفرقة بين الفتن والمصايب
مثل الخصوم أللي تشن الحرايب=بالله طلبتك تستر الحال يالله
والعين عيالك حطهم في عيونك=وعلم صغير السن منهم شئونك
اذا تباهم في اللزم ينفعونك=ولازم تربيهم على طاعة الله
والغين غريب الدار له حق واجب=لو تصدفه في عاليات الرقايب
بعيد عن دار الاهل والقرايب=وحالة غريب الدار يعلم بها الله
والفا فرض ربي علينا فروضه=وعرض علينا في المقابل عروضه
مثل القروض ومن يسدد قروضه=يوم القيامة مدخله جنة الله
والقاف قلوب الناس ماهي سوية =فيها القلوب الطاهرة والنقية
وبعض القلوب بداخله سم حية=هذيك القلوب الحاقدة جارنا الله
والكا كلام الصدق مافي مثيله=ومن مايقول الصدق ممقوت قيله
وقليل من فعل المراجل حصيله=كذاب في الدنيا ولا قابل الله
والام لزومك لا تخلي لزومك=ان قمت في لازمك محدن يلومك
والناس لا تشكي عليهم همومك=أقنع بما في يدك واتحمد الله
والميم منهو له حقوقن علينا= مثل ولي الامر والوالدينا
مامنه عذر بوقت شدة ولينا=وطاعة ولي الأمر من طاعة الله
والنون نور العلم لاتترك العلم=بالعلم تصبح رجل معروف ومهم
والعلم يبني صروح والجهل يهدم=واللي معاهم علم قدرهم الله
والها هوا نفسك حذاري تطيعه=وخذ من فروع العلم واترك وضيعه
ومن باعكم بالزود بالنقص بيعه=والناس عاملهم بما يرضي الله
والوا ولد عمك واخوك ورفيقك=ذراك في الميقاف وبلال ريقك
في لزومهم دوس اللهب في طريقك= تشوف ماقفهم نهار الله الله
واليا يامن نور الرب دربك=بالدين وتكفل بأكلك وشربك
داوم على ذكره في سلمك وحربك=وصلو على من بالهدى خصه الله