سلام الله بردة من صميم القلب والوجدان = على من شرف الحفلة وللحفلة وداعيها
من هجوسن تسابق كنها ألا الخيل بالميدان = تحضر لي الحروف أللي تنومسني معانيها
تشرف ماقفي في ساعة الماقف مع الصدقان = رياجيل اللزوم أللي مواقفها توفيها
معارفنا الصبوح أهل الوفا من سابق الأزمان = ولو قلت المدايح كلها ما ظن تكفيها
ولا بنسى الضيوف أللي لفو من ساير الوديان = وشفت الشيخ عايش والجماعة في حراويها
من رجال المواقف والوفا والعرف والأقنان = حصونن نايفة من أول الهجرة لتاليها
وانا قلت الحقيقة أللي لها عندي شهود اعيان = تواريخ العرب واوطانها وأللي سكن فيها
بعد هذا بذكر كل من حاضر من الأخوان = بذكرا واجب المسلم على المسلم يؤديها
بوصيكم ونفسي بالتقى وعبادة الرحمن = مدام ارواحنا لا بد مرجعها لواليها
وصلو مافرض ربي عليكم واتلو القرآن = ترا الأيات يوم الآخرة تشفع لقاريها
وعليكم بالزكاة وبالعطا والعطف والاحسان = ترا بعض الخلايق عيشته ماهو ملا قيها
وعليكم بالعفاف وبالقناعةوأخزو الشيطان = ترا الشيطان خصم ويهلك الأنفس ويغويها
وترا المسلم موصى من رسول الله على الجيران = ولو جارك تعدا زلته حاول تعديها
وترا المسلم أخو المسلم هنا وبساير البلدان = وللمسلم حقوق وواجب المسلم يراعيها
وعدو ما ستطعتم من عدد لمواجه العدوان = وذا واجب على الأمة وبه ربي موصيها
وعسى الله يعز دولتنا ونحيا في أمن وامان = وينصرها على كل الخصوم أللي تعاديها
في حكم عيال عودن بالجزيرة وحد العربان = عيال ابن سعود مؤسس الدولة وبانيها
على دستور شرع الله وتو حيده لها عنوان= تحت راية أبو متعب مثبتها وبانيها
وصلى الله على محمد عدد ما تمطر الأمزان = بديرة مسنية واعداد ماتنبت مراعيها