قالو علامك مادخلت الحضارة = عايش في وسط الريف طول المدودي
مالك رصيد ولا بنيت العمارة = والبيت شعبي من عصور الجدودي
تمشي بسيارة بدون استمارة = موديلها من عهد عاد وثمودي
ضيعت نفسك في القرى ياخسارة= تخايل بروق المطر والرعودي
روح المدن وادخل مجال التجارة = ماينفعك دخل (ن) قليل امحدودي
اسمع كلامي وانت عندك مهارة = لاتكون عن تبع المراجل رقودي
قلت اذكر الله خل عنك العيارة = مازادت الاعمار كثر النقودي
من لمها ماجابها عن جدارة= بالحظ ماجاته ببذل الجهودي
والرزق ياتي للحنش فالمغارة = واللي عطاه الله ماله حسودي
اخوك شاطر محترف في الشطارة = واسعى لكني ما أتعدى حدودي
ساكن في داري واعتبرها منارة = وحبي لها في كل يوم يزودي
راضي بها في بردها والحرارة = واعرف جمايلها ولاني جحودي
يوم السنين القاسية والعسارة = ربيت فيها لين كبرت عضود ي
ثابت ولا دورت عنها خيارة = مثل الجبال الراسيات الركودي
وا للي يجي زاير هلا بالزيارة = والثانية ماعن لقاها صدودي
من دونها زندي يولع شراره = يعجبك فعله يوم قدح الزنودي
والحر مايترك مقره وداره = واللي يروح اليوم باكر يعودي
واعطيك جملة من صحيح العبارة = حكم ضميرك واستمع للردودي
وانت لبيب وتفتهم بالاشارة = حنا تحت حكم المليك السعودي
الحضر واهل الريف واهل البرارة = ترعاهم الدولة وعندي شهودي
اخذ تقاعد من مقام الوزارة = ومن جود خالقنا ترانا نجودي
راضي على المقسوم سر وجهارة = مانشتكي واللا نبيح السدودي
وانا اطلب الله دائما فالصدارة = ولا خاب من يطلب كريم ودودي
واخيل البراق وارعي مساره = واقول يالله من سحاب يقودي