يا مبارك جهز البكـس الجديـدي=وارد اليابـان تصميـم الوكالـه
ونش فتحه يعجبك شكله فريـدي=بويته كنها الذهب في وصط صاله
طوروه الشغل زر بلمـس ليـدي=والشبح والشاص كنهم من عياله
إذكر الله لشتغل يرعـد رعيـدي=يعجبك شكله ويعجبـك اشتغالـه
يقطع المشـوار لديـار ٍ بعيـدي=يصل المشتاق ذي مبعـد حلالـه
شل مكتوبـي وبلغـه الحميـدي=قل أنا مرسول خذ منـي رسالـه
با يرحبك علـى منتـه تريـدي=يكرم الضيفان من غالـي حلالـه
المراجل لسبيعـي شـي أكيـدي=وارثنها من أبوه ومـن خوالـه
سوق لسهم يالشلي صفر رصيدي=من دخل فالسوق واعزي لحالـه
والإبل راحت على البدو الشديدي=موتت من بعد معطوهـا النخالـه
بس أبو متعب عسى عمره مديدي=عوض أهل البل وكل ٍ قد دعالـه
ختمها مصفاه فاحـت بالعويـدي=بمجلسن فيه النشا ما قـال قالـه

مرحبا بموجـه البكـس الجديـدي=من شروره لا شـروره بالرسالـه
كلها كيلو في كيلـو مـا تزيـدي=من جنوب أقصا البلد حتى شمالـه
وكلنا مقيمين يـا لقـرم السديـدي=في شروره مـا طلبنـا الاستقالـه
وأنت خابر قبل توجيـه القصيـدي=عند أبـو هـذال تربطنـا زمالـه
والرياضـة طيّبـه دائـم تفيـدي=دامها متريـن والدعـوى سهالـه
ريّح الفكسار فـي ظـل الجريـدي=وريّح مبارك عسـاه يطيـب فالـه
والله أيحييـك لـو مابـه نشيـدي=الكفـو نفـرح ليـا شفنـا قبالـه
لا نصا ني مثلكم هـا ذاك عيـدي=أتشرف وأعتبرهـا أكبـر جمالـه
ولا برحبّه على مـا هـو يريـدي=سلمنا سلم الرجال أهـل الشكالـه
وكانها فاتت عسا ها مـا تعيـدي=ما دخلني شـك فـي راع الجزالـه
أنت وافي ما يجي منـك الزهيـدي=مير أنا أخشى من كلام أهل النذاله
ينتقـد نـي واحـدٍ ودّه يصيـدي=كلمةٍ يفـرح بهـا لا ضـاق بالـه
ومن بغى يحصل على الدر النضيدي=لازم ٍ يتعب قبـل يطـرح سوالـه
يتعب الأفكـار للمعنـى الفريـدي=ويتخيّر لا نـوى الشعـر وبدالـه
والمعانـي حدهـا سيـفٍ حديـدي=ما تجامل كل مـن يكتـب مقالـه
وأنت تنشدني وأبعطيـك الاكيـدي=جاك مردودي على حسـب الدلالـه
سوق الأسهم ذاب ذوبات الجليـدي=وأكثر العالم تسبـب فـي زوالـه
ما تحمّل صدمة الوقـت العنيـدي=جعل حالك يالشلي ما هوب حالـه
والوكاد إن فيه من هو مستفيـدي=والله أعلم من هو اللي قـد حبالـه
واحـدٍ بيحـا سبـه رب العبيـدي=في نهار ٍ مـا يفيـده كثـر مالـه
والنخالة جـا لهـا دور ٍ جديـدي=عقب الأسهـم كملوهـا بالنخالـه
جددت الأحزان والماضـي يعيـدي=وانتهت بين الصوامـع والعمالـه
كل منهـم يتهـم سـاع البريـدي=ولا درينا وش وراء هـاك الثعالـه
مير أبو متعب عسى حظه سعيـدي=عوّض اللي ماتت أبلـه واعتزالـه
ما قفٍ مـا ينجحـد والله شهيـدي=من تضرر عوّضه وأكـرم إسبالـه
ولو بغيت أعـدد أفضالـه تزيـدي=بعد فضل الرب يـا مكثـر فضالـه
والله أنه يحفظه مـن كـل كيـدي=ويحفظ أخوانـه موازيـن العدالـه
هم ذرانا هم لنا الـدرع الجويـدي=أسرة آل سعود يـا نعـم السلالـه
والختام أسلم وفسّـر مـا تريـدي=جاك رد اللي ورث عمـه وخالـه
شاعر ٍ يالمردعـي فكـره يجيـدي=كـل طـاروق ٍ يجيـده لا طرالـه