محمد الربيقي=
بعد ما دعاني طيب الصيت يمه جيت= راع الماقف المحمود باللين والشده
حبيب نوى بأخر مخطط يسوي بيت = يبيها بعفيف وكهرب البيت من جده
حبيب العازمي =
بعد ماجيت وانا جيت وافي وانا وفيت = وهات الكلام اللي بصدرك وخذ رده
انا عامرٍ بيتي ويكفيك عنه الصيت= لكن البلى اللي يبنى البيت ويهده
محمد الربيقي=
على الاوله يالعازمي خانك التوقيت= تبي الاوله لكن فاتت لها مده
يقولون عن كل الموارد يكفي هيت= تنازل عن المسرى وحرج على العده
حبيب العازمي=
انا اخذت قسمي وانت ماقلت وش سويت = تعشيت ضيفة ضيف والا عشا بده
هاذي فزعتك وانته شبابي لكنك اخطيت = تباها هجوم وجتك في الحال مرتده
محمد الربيقي=
انا ياحبيب يوم جيت الحرم صليت = وبعض العرب غافل ومشغول بالكده
انا يوم شفتك قمت وبفزعتك خصيت = على ساقة المقفين ماهي اليا الرده
حبيب العازمي =
والا يازمان الخير واليسر وش خليت = جرحت الحزين اللي دموعه على خده
ياليتك صبرت وقلت يمكن لعل وليت = وبعض العرب ماشيف مزحه ولا جده
محمد الربيقي =
عسى ماحصلك باس وش شلت وش حطيت = علامك تذيع بصبرك اللي وصل حده
من العام تعلن في البشاير وكيت وكيت = و غاض البحر ماشيف جزره ولا مده
حبيب العازمي =
نزلت الجنوب وقلت ابا اكتف العفريت = وشديت عقب اسبوع والشده الشده
انا ما دخلت الشعر بالصوت والتصويت = دخلته وبعض الناس وده ولا وده
محمد الربيقي =
بنينا لنا بيت جداره حجر وسميت = وبعض الرجال من العنا بايح(ن) سده
انا يوم شفت العلم عود كذا صديت = لكن ابن عمك يجهر الموس ويحده