المشاركة الأصلية كتبت بواسطة علي هليل الحربي

قالوا حزين وقلت حزني طبيعه=جوري على بعض المشاريه راحه
الحزن رحمه لابلتك الفجيعه=وقلب الرضى ترضيه بعض السماحه
الوقت جاير والليالي سريعه=ولاعاد للتفكير فيه استراحه
وقتٍ مضى بالصدر فرحه بديعه=بين القلوب البيض سر انشراحه
لاجيتهم همك يولي جميعه= معهم يطيب القلب بظلال واحه
وسع الفيافي للقلوب الوسيعه=قبل الكلافه والعتب والنصاحه
واليوم جدران الوناسه صديعه=لو رمموها بالسفر والسياحه
بالناس ياكثر الطمع والقطيعه= وياقل من تلقى بعقله رجاحه
السن يضحك والضماير وجيعه=والقلب عيَا الهم يطلق سراحه
كم واحدٍ يخفي صفاتٍ شنيعه= ولكل نعمه جاهزٍ في سلاحه
هذا من النكران يجزى الصنيعه=وهذا ضحية من حكى له وزاحه
باسباب منهو بالمفارق ربيعه=وقلوب غيره منه تشكي جراحه
نقلت همه بالضماير وديعه=ولقيت ضره في محاني مراحه
دورت له بالذاكره لوذريعه=لقيت فزعاتي له بكل ساحه
همه يزود الكره مع كل بيعه=وكلٍ حسب كرهه يقدر نجاحه
من مذهب السنه وبه طبع شيعه=وهذا هو الي زوَد امره فداحه
الوجه صورة قلب غيبه يذيعه=بابلغ لغه لاهل الشعر والفصاحه
قريت سطرٍ فيه عبره فضيعه=كذب وحسد بشعور نقص وشفاحه
واخذت سجه مع هجوسٍ مريعه=فيها قضيت الليل لاول صباحه
وعاهدت نفسٍ في وفاها شجيعه=اشوح كفٍ شد كفي وشاحه
ان طاع ولاَ الوقت والله ماطيعه=لواتصفق في مصافق رياحه
واوصيت بامرالله وحفظ الشريعه=يعمل بها مشعل على الله صلاحه
ترى الفرايض عند ربك شفيعه=وعندك حديث المصطفى في صحاحه
ومن المنازل خل دارك رفيعه=ترى الطمان السيل هدد طياحه
بعض المعادن يعجبك من لميعه=شاور عليه الي يضفك جناحه
ان صار من جنس الذهب لاتبيعه=جوَد يدينك فيه تلقى فلاحه
وان كان من غيره تراها هزيعه=يامعرَب الجدين مابه رباحه
وخاطر عمامك قدمه بالطليعه=وعودٍ تبلواه الدهر ماستباحه
ونفسٍ تردك للاهانه دنيعه=ان عودت للدبج عافت قراحه
من نزعة الحاضر لحد النزيعه=لقحتها خاطر خطيرٍ لقاحه