سلام ينساق سوق مبهرات الدلال=صفر(ن) خلط هيلهن مع زعفران(ن) حمر
ياصحابنا اللي لكم في كل جزله مجال=يابدو لو البداوه مابقاله عصر
يابدو مامثلكم فوق البسيطه رجال=ياكود من ساسهم منكم وصارو حضر
ياهل الكرم والشجاعه والوفاء والعدال=هذي لكم كلها وابصم لكم بالعشر
يابدو ياللي فتنكم ربنا فالحلال=لولاه يابدو مبطي واصلين القمر
بس التهيتم وراء طرد الغنم والجمال=طافت عليكم دروس وراح بعض النمر
اهل الشهادات في منصب وتحت الظلال=والمنسدح ينسدح وألا يموت بقهر
العلم يبني بيوت العز فوق الجبال=والجهل واضح من اسمه واعرفه ماعمر
تسلحو والعلوم سلاح مثل الريال=ومن لاصبر للغريسه كيف يجني ثمر
مع طيب الخلق والعفه وحبل الوصال=لاينقطع لو على شانه وطيتم جمر
والدين هذا سنام العز في كل حال=اطاعة الله واجب ثم ولي الامر
والباقيه باقيه والفانيه للزوال= والثانيه والدقيقه من حساب العمر