يا الله انا طالبك عفوك يا كريـم ويـا قديـر=انا الضعيف لرحمتك وانته وسيـع المغفـره
طالبك غفرانك ومرضاتـك وتيسيـر العسيـر=وتوفيق ما يرضيك ياربـي وعيبـي تستـره
انت العليم انت الحليم انت الخبير انت البصير=وحنا عبادك ان تشاء نبصـر بشـيٍ نبصـره
وقفت ادير الفكر في بحر الهجوس المستديـر=امسيت في غبة بحر وهجوس فكري مبحـره
ومن باب علم الفلسفه حللت موجات الاثيـر=وارسلت موجه ثانيه عبـر الاثيـر مشفـره
الموجه الوسطى تلاقطهـا رمـوز المستنيـر=والموجه العليا على رمـز الفهيـم مسيـره
ما جيتها بطره ولكن جابهـا صـوت النذيـر=وماينوخذ بعد النذيـر الا الطيـور المخمـره
الى متى وحنـا كـذي لا نسيـر ولا نطيـر=حنا بعالـم عولمـه والصـوت لازم نجهـره
ياكبر شرهتنا وحنـا بـا الاثـاره مـا نثيـر=ويـا طلـع نـادر تخلينـا ولحـدٍ عـبـره
امجاد من كانو قبل ماصحت الجيـل الاخيـر=المجـد يصنـع كـل يـوم ولليالـي نذخـره
فينا انانيـه وفينـا خـوف منقطـع النظيـر=شـوارد الافكـار فينـا مـا تهيـد مـذيـره
فجوه كبيره فارقه بيـن الموظـف والمديـر=ومن قال ابي حقي يقال اليوم يكتب محضـره
واليا جلس راس الفتوه قال ما معيه خشيـر=انا المعلـم والكبيـر انـا تـراي المفخـره
قالولنا منصور قلنا يـا عسـى خيـره كثيـر=نبي نصوت مع جماهيـره ونعمـل جمهـره
قالوا عسى الله يرزقه قلنا ترى ماهـو فقيـر=الذيب ماعابوه فـي فقـره ياقالـوا مفقـره
هذا وانا ماني وزير ولا معـي رقـم الاميـر=ولاني بدكتور العقـول ولا درسـت الدكتـره
هذي روايه من رواياتي ماهي من شكسبيـر=جوليان مايذكر بها وجولييت فيهـا ماذكـره
قصه قصيره لابسه بشت الـوزاره والوزيـر=فيها البطل منصور قولوا ياعسى الله ينصـره