غلطان ياشاكي على الخلق حاله=الحال مايشكى على غير مولاه
الخالق المعبود جلا جلاله=اللي لياضاقت على العبد ناجاه
يالله ياللي عالمٍ كل حاله=علام سر الغيب ماغيره إله
إنك تعز اللي برايه جهاله=تهديه في درب السعاده بدنياه
انا إليا منه هرج في مجاله=يفز قلبي كل ما أوحيت طرياه
بالطيب جعله مايجي بالرذاله=أخاف من هرجة خمامٍ تقفاه
عندي هرج به واحدٍ في مقاله=والهرج ياثقله على الكبد ثقلاه
عيا يهيد الجفن مما طراله=والكبد عيت تقبل الزاد عزاه
كمل نهاره ساهرٍ مع لياله=تطلع نجوم الصبح والنوم ماجاه
ماهمه اللي زاهيٍ في جماله=ولاهمته دنياه والحب مااشقاه
همه دروب أهل الفخر والشكاله=يوم الردي تقصر عن الطيب يمناه
خطو الردي تقصر عن الماء حباله=خاب وخسر ياعزوتي من ترجاه
عند الحليله جالسٍ مع عياله=يشكي عليها الحال لاعمست ارياه
وخطو الولد لوهي ضعافٍ حواله=يقوم في حمله طويالتٍ خطاه
يدفع على الطالات من حر ماله=حتى يثبت موقفه عند شرواه
ياطير خذ مني لمحسن رساله=أبغيك تعطيه الحرايض ويقراه
ليا قرا المكتوب عطني بداله=يعطيك رده عقب مايشوف معناه
وقله ترا ضيعت درب العداله=وقله يذب الداب من وسط مخباه
النفس قواده لدرب الرزاله=والرجل له رايٍ عن العيب ينهاه
هذي دروب أهل الردى والرجاله=وانته تخير دربك اللي توراه

الله على اللي جاهزٍ بالوكاله=على الطلب واليا بغيناه جبناه
مابه قصود ولا طلب بالكفاله=اول موديله يعجبك زين ممشاه
راعيه شفقٍ للسفر وانتوى له=يحرم عليه النوم لوطال مسراه
حتى يزور اللي عناله وجاله=ويسلمه خطٍ عنا به ووداه
لضيف الله اللي وافيٍ بالشكاله=قرمٍ ربوعه حزت الضيق تنصاه
ياخوي حالي مالقيت الدوا له=جيت الطبيب ولاعرف ويش مشكاه
وشكيت للي ماخسر من شكاله=الوالي اللي عارفٍ داه ودواه
يالله يامنشي المطر من خياله=ياواليٍ نرجي ثوابه ونخشاه
إفرج لمن حمله ثقيلٍ وشاله=دار الزمان وبيح أقصاه وأدناه
راع النميمه باع له وأشترا له=وهيهات ياهرج على غير معناه
وإن ذمني ياخوي ولد الهزاله=ياعزوتي هرج الردي كيف ترضاه
اللاش ولد اللاش مالك وماله=مدحه وذمه عند مثله وشرواه
وياخوي شرب التتن مابه عذاله=شربوه حكام الدول ماشربناه
وشربوه عكفان الشوارب جهاله=دخان والدخان مابه مداراه
كم يشرب الدخان حلال قاله=وكم واحدن مايشربه كنه إنثاه
مايعيب اللي وافياتٍ خصاله=ولابه معيبه يازبون المخلاه
والطيب والطالات للي سعا له=ولا يقطع الفرجات راع المراواه