أشوف باوضاع البشر نقص وخلاف =مـدري أنـا غـلـطــان ولا ّ مـثـالـي
اللـي مـعـه مــال ٍ يعـامـل با للطاف =ويحسب على ربعه عزيز ٍ وغالي
إذا دخـل مجـلس فـزوا له وقـاف =واستـقـبلوه بعـود وصفر الدِلالي
هــذا يحب الخشـم وهــذا بالاكتاف =وهـذا بعـيد هـناك يـبـغـى مـجـالي
ثم قدموا سفره بها أنواع واصناف =وجاك المفطـّح في صينيّه يشالي
وقالوا : تـقـدّم مرحبا بالذي ضاف =واجـب عـلينا نـِكـرم أهـل المعـالي
أما الـفـقـير اللي بـلا مـال يـنـعـاف =أكـبر خطـاه انّه مـن المـال خـالي
إذا دخـل مجـلس خـلـوه بـطـراف =ما يـوحـي إلاّ قـرقـرت هـالعـيالي
وإذا المعـزب رحب بجمـع الاشراف =يقـلط على صحن الصغار الموالي
ولو مرت أعوام ٍ طويلة ولا انشاف =ما يذكـرونه حـتى لـو بالسـؤالي
يعـامـل بـقسوة ويعـامـل بلجحاف =ويقـال في حقه هـبيـل وظـلالـي
ويصير في عزلة من الناس ويخاف =من ما بقاله من صدوف الليالي
باللـه يا عالـم بس وين الانصاف ؟ =إنصافـكم ويـنـه مـن اللـي يـقالي
واللـه ثـم واللـه واعداد من طـاف =المـال يـفـنـى والعـمـر للـزوالي