يازيد يانجل الرجال الميامين=يابو فهد يابن الرجال الحشاما
حركني الهاجس وصنفت بيتين=وابستشير محكمين الكلاما
نصيت لي رجال يملك ملاين=غير السلف يازيد مالي مراما
وعودت ماحصلت من لازمي شين=من شخص ماله بالمروه نظاما
يازيد لو كل الرجاجيل وافين=ماصار بالعالم عفون ونشاما
الطيب منهاج الرجال الوفيين=ولا العفون من الرجوله يتاما
ماهم على فعل المروه حريصين=هدفهم المقصود جمع الحطاما
والادمي يازيد مخلوق من طين=ومدح الردي بدعه وذمه حراما

ياشامخ النابين خلك على يمين=ياسامياً عن كل هفوه تساما
مانته بحاجه راي بعد الثمانين= باللي مضى رايك قناد الضراما
ولانته بغاوي وين يابدر ومنين=تعرف نوايا مفطرين الصياما
اللي لهم مع هزل الالحان تلحين = شتى وفصايلهم فصيله تواما
مجبور واحدهم يجي ثالث ثنين=ويصحي الفتنه واهلها النياما
وانا اقتدي بافكار بعض المسنين=اللي تجاربهم تفيد الغشاما
حطولهم عن كل منقود تامين=وعيونهم عن كل هفوه تعاما
والله خلق بالناس هزلا وجزلين=ومهديهم النجدين قبل الفطاما
كل على ماله مليك الخيارين=ان جاد يشكر وان ابأ مايلاما
الا الذي بالواجبه بين قوسين=لاصار ماله بالزوم التزاما
والطيب ماهو بالرجاجيل تخمين=كواكب يجلئ ضياها الظلاما
والله يعين المستحين الكريمين=من جيلنا الحاضر واهلنا القداما
والمسعدين اللي عن الناس مغنين=عن مدحت الطيب وذم الهلاما
قد قالها اللي في وصاياه موصين=مانحط بالصف العزيز انقساما
عزيز والعزوه تعز العزيزين=حربي ولك بالمجد ذروة سناما
وان كان قصدك تجربه لبو حدين=ابشر بمصقولٍ يقص العظاما
لعيونك الثنتين مبطي وهالحين=ودم الحميا مع نمانا يتناما
والخشم لو يلطم تبى تدمع العين=يابدر الاعضا مع بعضها تحاما
وصلو على محمد شفيع المصلين=عليه اصلي والسلام ختاما