السلام عليكم ورحمة الله وبركاته
أسعد الله أوقاتكم جميعًا
أبيات متواضعة لعلها تنال إعجابكم.,,
أنا بالأرطاوية وجاي من هيت= أبغى القصيم وربك يكون بالعون
رحال ماني مع قنوص وكواشيت= أتبع هوى وضح ن بها صرت مجنون
كانك تبي تنشد عن الحال حييت = أنا بخير ولأهل الطيب ممنون
ولامن جدايد غير قاف ن على (ايت) = ألفى علي وأنابيدي الدركسون
وشغلت لي بمسجل الجيب كاسيت= غناء محمد عبده وفرقة فنون
وكتبت لي بك يأتلع الجيد كم بيت= تعنيك يالمجمول معنى ومضمون
البارحة في تالي الليل دقيت=على الحبايب مار عيوا يردون
أزهم على الجوال وأزهم على البيت= حتى الخدم مايرفعون التليفون
يانور عيني كان دوبك توريت=على فراقي لاتسارق على هون
أنا ترى مااقبلت كان انت مااقفيت= مانيب من بعض المواضيع مغبون
خذ الحقيقة كاش مادامك ابطيت= تراك معي من أول الوقت مديون
أطلبك وتماطل بحقي ولا اوفيت= موعد على الراتب وموعد على الشون
النفس طابت منك مره وأنا أجزيت= مقفي ترك مقفي ولا عاد يلفون
أثًر خريفك في ربيعي وحتيت = خضر الورق وأيبست من فعلك غصون
استوحشت منها الحمايم وغنيت= واستقبلت صوتي وغنت لي لحون
ياذا الحمام اللي لأجل خاطري جيت= مااعذب هديلك لكن القلب مشحون
ماعاد لي قدرة تحمل وسمًيت=أنويت واستهويت وأبحت مكنون
وللصوت بأعلى نايف الرجم جريت= فرقًا عليها العلم وابليس ملعون
النفس بتاعة وأنا ماتحريت = اجابة المقفين لوكان يوحون
لاخاب ظني بأي صاحب تهقويت = أفارقه بالوجه الأبيض ولايهون
طبعي كذا استغربت والا أقريت=ويبقى غلاه بداخل القلب مصيون
وشلون أببعث حي والا اقتل الميت=أبترك الصفحة من حروفي بدون
تاخذني العزة بإثمي وإذا جيت= قلت الغلا من الله وأنا مابيدي لون
اديار أقدر ناسها من سبب بيت= وإنسان أجافي من سبايبه مليون
وتقبلوا تحيات أخوكم /
أحــمــد بن نــاحــل