ياعنك بعض الناس ماهو برجال=لاشاف ظله مـن هوانـه يذلـي
لقلته بمـلا يدينـك مـن المـال=يحب رجلك جعل مثلـه يولـي
ليا ركب فوق الفرس قال خيـال=وليا نزل قال الاويفه اخون لـي
يقول صلو ياجماعه على الحـال=نصاح وانه ياعـرب مايصلـي
جبان ساكت واكوع القول لقـال=ولاهو بشيخن وجهه ابيض يهلي
يقول طلنـا فالمعالـي ولاطـال=والناس ذولي كلهم تحـت ظلـي
يبتر يمين الحق هابـي وميـال=سيفه على وجهه الرفيق يسلـي
يابنت دربن فيه الانذال تحتـال=ماهو بدربن لي ولا منـزل لـي
لعل شجره ماتحت فرعها اضلال=عروقها تحـت الثـرى ماتبلـي
من يشتكي دنياه لايتـرك الفـال=مال الحياه من التصاريف ملـي
ومن يظلم الاجواد يالـو مثقـال=يلقى الظلايم كلها فـي السجلـي
يارجم ابا اعديك لاضاق بي بال=واجيك عجل اليا تذكـرت خلـي
واشب ناري فوق راسك ليا حال=دون القمر غيمن ولانـي مكلـي
بابعد ولالي في سواليف الانـذال=اللي على كسب المراجل تزلـي
ولاجاك من طلقين الاشناب عيال= اخبرهم انه من وراثـه محلـي
الصقر له فوق المراقيب منـزال=والذيب صوته من سطاوه يجلـي
لعل دارن حلهـا لابـس الشـال =الغيث من عالي سماهـا يهلـي
يصبح عليها الغيث بالجود همال=والارض من عقب الضما تستهلي
وتونسه دنياه وتزيـن الاحـوال=والنوق من نبت البـراري تفلـي