لاجفاني في هوى برد الطويلين الذرى=مايدفيني لهب نارٍ بجوفي تصطلي
كلها سبة فراق اللي على فكري طرا =صاحبً مقفي وذكره دايم يعود علي
والهجوس استوطنت فكري وأناأسمع وأرى =أحمضن في نظم قيفاني ووردن منهلي
أمسي بقاعة كرا وأصبح على قمة كرا =من هجوسن تضرس اضراس المحالة بالدلي
صاحبي مرتعك في قلبي قفر وأرضه مرى =مابه الدايج ولاالطاير ولامثله حلي
محتميه لجيتك لوكل مدهر به درا=ولو سمحنا للعسوس إن كان مبطي ممتلي
فيه من وسميتك عشبٍ عروقه بالثرى=واصفقه برد وهجير ويطمع بوصلك ولي
كل مابرقك سرا يضوي معه ليلي سرا =يالله بريح الحيا والبرق ضوه ينتلي
جاء مع القبلي خيالٍ للسقيا به حرى =وأجنبت به نكبةٍ خلته عنا ينجلي
ولالقى هكالدفين اتبوع والعود انبرى= مثل شوقي للوصال المنقطع وأنته ملي
اقرب اقرب شوف مرباعك من الحدب وورا =لايصير بخطو دام من الشقا ماهو خلي
ياربيع القلب حنابالهوى صرنا اخشرا =مااعرف بالحب غير إني أنالك وأنت لي
غير دارك لوضفا المخضار في كل القرا =مارغبته لوزبيديه كبر راس الطلي
مايأثر بي كلام اللي على وضعي زرا =المحبة كلها بلوى وأنا بك مبتلي
لكن ارفق بالجفون اللي محاربها الكرا =ماجداي الا القصايد بالطويل المعتلي
صاحبي ياصاحبي اسمعني وركز ترا =بالمثل مالحب إلا للحبيب الأولي
وأنته معرض هبوب شباط قلبٍ ماضرا =للجفا.. ولا أستفيد إن قلت ياربعي هلي
ولايفيد الشعر لكنه يوضح ماجرا =أكتبه .. وأطرب لبدعه وانبهر بالأجزلي
بالنبط يشدني شعر ابدويًا ماقرا=وبالفصيح الأصمعي.. صوت صفير البلبلي